8ம் தேதி நடைபெறவிருந்த பி.எட். தேர்வு 13ம் தேதிக்கு மாற்றம்!

ஆசிரியர் தகுதித் தேர்வு நடைபெறுவதால், ஜூன் 8ம் தேதி நடக்கவிருந்த பி.எட் தேர்வு தேதி மாற்றம் செய்யப்படுவதாக உயர்கல்வித்துறை முதன்மை செயலர் மங்கத்ராம் சர்மா தெரிவித்துள்ளார்.

தமிழகத்தில் ஆசிரியர் கல்வியியல் பல்கலைக்கழகத்தின் இளநிலை, முதுநிலை தேர்வுகள் இம்மாதம் 29ம் தேதியிலிருந்து அடுத்த மாதம் 13ம் தேதி வரையில் நடக்கிறது. ஆசிரியர் படிப்பில் இரண்டாமாண்டு இளநிலை மாணவர்கள் ‘ஆசிரியர் தகுதி தேர்வு’ எழுத தகுதியுடையவர்கள் ஆவர்.

இதனிடையே, தமிழகத்தில் ஆசிரியர் தகுதித் தேர்வுக்கான தேதிகள் நேற்று அறிவிக்கப்பட்டது. அதன்படி, ஜூன் 8 மற்றும் 9 ஆகிய தேதிகளில் டெட் தேர்வுகள் நடைபெறுகிறது. ஏற்கனவே, அந்த தேதிகளில் பல்கலைக்கழகத் தேர்வும் நடைபெறுகிறது. இரு தேர்வுகளும் ஒரே நாளில் நடப்பதால், எந்த தேர்வை எழுதுவது என்று தெரியாமல் மாணவர்கள் குழப்பத்தில் உள்ளனர். இரு தேர்வுகளும் பாதிக்கப்படாதவாறு தேர்வு தேதிகள் மாற்றியமைக்குமாறு மாணவர்கள் வலியுறுத்தினர்.

இந்நிலையில், மாணவர்களின் நலன்கருதி ஜூன் 8ம் தேதி நடக்கவிருந்த பி.எட் தேர்வு தேதி மாற்றம் செய்யப்படுவதாகவும், 8ம் தேதிக்கு பதில் 13ம் தேதி தோ்வு நடைபெறும் என்றும் உயர்கல்வித்துறை முதன்மை செயலர் மங்கத்ராம் சர்மா தெரிவித்துள்ளார்.