பொறியியல் பொதுக் கலந்தாய்வு இன்று தொடக்கம்

சென்னை: பொறியியல் படிப்புகளுக்கான பொதுக் கலந்தாய்வு சென்னை அண்ணா பல்கலைக்கழகத்தில் இன்று தொடங்கவுள்ளது.

தமிழ்நாட்டில் அண்ணா பல்கலைக்கழக கல்லூரிகள், அரசு பொறியியல் கல்லூரிகள், அரசு உதவி பெறும் கல்லூரிகள், தனியார் சுயநிதி கல்லூரிகள் என 583 பொறியியல் கல்லூரிகள் உள்ளன. இவற்றில் சுமார் 2 லட்சம் இடங்கள் அண்ணா பல்கலைக் கழகத்தின் பொது கலந்தாய்வு மூலம் ஒற்றைச்சாளர முறையில் நிரப்பப்படுகின்றன. இந்த ஆண்டு பொறியியல் படிப்புக்கு ஒரு லட்சத்து 34 ஆயிரத்து 722 பேர் விண்ணப்பித்துள்ளதாக தெரிகிறது.

பொறியியல் படிப்புகளுக்கான கலந்தாய்வுக்கு தரவரிசை பட்டியல் வெளியிடப்பட்ட நிலையில், பொதுப் பிரிவினருக்கான கலந்தாய்வு இன்று தொடங்கவுள்ளது. இன்று முதல் ஒரு மாதகாலம் நடைபெறவுள்ள இந்த கலந்தாய்வுக்கு தினமும் சுமார் 5 ஆயிரம் பேர் அழைக்கப்படுவர்.

விளையாட்டுப் பிரிவினருக்கும், மாற்றுத் திறனாளிகளுக்குமான கலந்தாய்வு ஏற்கனவே நடைபெற்று முடிந்து விட்டது என்பது குறிப்பிடத்தக்கது.