சென்னை பல்கலை.யில் இலவச சேர்க்கை விண்ணப்ப விநியோகம் தொடக்கம்!

சென்னை பல்கலைக்கழகத்தின் கீழ் செயல்படும் கல்லூரிகளில் சேருவதற்கான இலவச சேர்க்கை விண்ணப்ப விநியோகம் தொடங்கியுள்ளது.

இதுதொடர்பாக சென்னை பல்கலைக்கழக பதிவாளர் ஆர்.சீனிவாசன் வெளியிட்ட செய்திக்குறிப்பு: இலவச கல்வித்திட்டத்தின் கீழ் சென்னை, திருவள்ளூர் மற்றும் காஞ்சிபுரம் மாவட்டங்களில் உள்ள சென்னை பல்கலைக்கழகத்தின் இணைப்பு தனியார் மற்றும் அரசு உதவி பெறும் கல்லூரிகளில் சேருவதற்கு விண்ணப்பங்கள் வரவேற்கப்படுகின்றன.

இந்த 3 மாவட்டங்களைச் சேர்ந்தபொருளாதாரத்தில் பின்தங்கியவர்கள், ஆதரவற்றவர்கள், முதல் தலைமுறை மாணவர்கள், விவசாயிகள், கணவரால் கைவிடப்பட்ட பெண்களுக்கு முன்னுரிமை அளிக்கப்படும். விண்ணப்பிக்கும் மாணவரின் குடும்ப வருமானம் ரூ.2 லட்சத்துக்கும் மிகாமல் இருக்க வேண்டும்.

இதற்கான விண்ணப்பங்களை சென்னை பல்கலைக்கழகத்தின் மக்கள் தொடர்பு அலுவலகத்தில் பெற்றுக் கொள்ளலாம். மேலும், பல்கலைக்கழகத்தின் www.unom.ac.in இணையதளத்தில் இருந்தும் பதிவிறக்கம் செய்துக் கொள்ளலாம். இலவச மாணவர் சேர்க்கைக்கான விண்ணப்பங்களை மே 8-ம் தேதிக்குள் பதிவாளர் அலுவலகத்தில் சமர்ப்பிக்க வேண்டும். இவ்வாறு அதில் தெரிவிக்கப்பட்டுள்ளது.