நூதன முறையில் சென்டம் வாங்கிய கர்நாடக மாணவர்

கர்நாடக மாநில 10ஆம் வகுப்பு பொதுத்தேர்வில் 625க்கு 624 மதிப்பெண்கள் பெற்ற மாணவர் ஒருவர் மறுமதிப்பீட்டுக்கு விண்ணப்பத்து 625க்கு 625 மதிப்பெண்கள் பெற்றுள்ளார்.

கர்நாடக மாநிலத்தில் அண்மையில் 10ஆம் வகுப்பு பொதுத்தேர்வு முடிவுகள் வெளியாகின. இதில் பெலகாவியில் உள்ள பள்ளி ஒன்றில் ஆங்கிலவழிக் கல்வியில் படித்த முகமது கைப் முல்லா என்ற மாணவர் 625க்கு 624 மதிப்பெண்கள் எடுத்தார்.

மாநில அளவில் இரண்டாம் இடம் பிடித்த இவர் அறிவியல் பாடத்தில் மட்டும் ஒரு மதிப்பெண் குறைவாக எடுத்திருந்தார். அனைத்து பாடங்களிலும் உறுதியாக சென்டம் கிடைக்கும் என்று நம்பியிருந்த முல்லா ஒரு மதிப்பெண் குறைந்ததால் அதிருப்தி அடைந்தார். உடனே மறுமதிப்பீடு (Revaluation) செய்ய விண்ணப்பித்தார்.

மறுமதிப்பீட்டில் அவருக்கு குறைக்கப்பட்ட ஒரு மதிப்பெண் அளிக்கப்பட்டது. இதன் மூலம் 625க்கு 625 மதிப்பெண் பெற்று அனைத்து பாடங்களிலும் சென்டம் மதிப்பெண்களை உறுதிசெய்திருக்கிறார். மேலும் மாநில அளவில் முதலிடத்தையும் பெற்றுள்ளார்.

தற்போது கல்லூரிப் படிப்பைத் தொடங்கியுள்ள அவர் ஐஏஎஸ் அதிகாரி ஆக வேண்டும் என்பதே தனது இலக்கு என்று கூறுகிறார்.