காசைப் பிடுங்கும் ஜி.எஸ்.டி; கற்றுக் கொடுக்க அழைக்கும் டெல்லி பல்கலைக்கழகம்...!

டெல்லி: ஜி.எஸ்.டி தொடர்பான பாடப்படிப்பை, டெல்லி பல்கலைக்கழகம் விரைவில் அறிமுகப்படுத்த உள்ளது.

நாடு முழுவதும் ஒரே வரிவிதிப்பு எனப்படும் ஜி.எஸ்.டி, கடந்த ஒன்றாம் தேதி அமலுக்கு வந்தது. இதனால் அத்தியாவசியப் பொருட்களின் விலை உயர்வதாக பொதுமக்கள் குற்றம்சாட்டி வருகின்றனர். இந்நிலையில் இதுதொடர்பான படிப்பை விரைவில் அறிமுகம் செய்ய உள்ளதாக டெல்லி பல்கலைக்கழகம் தெரிவித்துள்ளது.

அதனுடன் சைபர் சட்டப் பாடப்படிப்பையும் கொண்டு வரவுள்ளதாக கூறப்பட்டுள்ளது. இதுகுறித்து ஆலோசனை நடத்திய பல்கலைக்கழக துணைவேந்தர் யோகேஷ் தியாகி தலைமையிலான குழுவினர், ஜி.எஸ்.டி குறித்து தெரிந்து கொள்ள மாணவர்கள் ஆர்வமாக உள்ளதாக குறிப்பிட்டுள்ளனர். அதனால் வர்த்தக பிரிவில் ஜி.எஸ்.டியையும், முதுகலை டிப்ளமோ பிரிவில் சைபர் சட்டத்தையும் அறிமுகம் செய்யவுள்ளதாக கூறியுள்ளனர்.

இந்தியப் பொருளாதாரத்தில் ஜி.எஸ்.டியின் அறிமுகம் மிகப்பெரிய நிகழ்வு என்றும், அதனைப் பாடத்திட்டத்தில் சேர்ப்பது கட்டாயத் தேவை என்றும் தெரிவித்துள்ளனர். அதேபோல் அதிகரித்து சைபர் தாக்குதல்கள் குறித்து, இன்றைய இளைஞர்கள் தெரிந்து கொள்ள வேண்டும் என்று பல்கலைக்கழக கல்விக் குழுவினர் குறிப்பிட்டுள்ளனர்.

DU introduces GST, Cyber Law courses.