வீட்டிலிருந்தே சாப்ட்வேர் மூலமாக செய்முறை வகுப்புகள்!

இன்ஜினியரிங் மாணவர்களுக்கு வீட்டிலிருந்தே செய்முறை பாடங்களை புரிந்து கொள்ள, பிரத்யேகமாக சாப்ட்வேர் தொகுப்புகளை மத்திய அரசு வழங்கி வருகிறது.

மத்திய அரசின் மனிதவள மேம்பாட்டுத் துறையின் சார்பில் Virtual Labs எனப்படும் காணொலி ஆய்வகம் ஏற்கனவே பயன்பாட்டில் உள்ளது. இந்த காணொளி ஆய்வகத்தை பயன்படுத்தி கற்றல் திறனை வளர்த்துக் கொள்ளுமாறு மனிதவளத்துறை அமைச்சர் ரமேஷ் பொக்ரியால் தெரிவித்துள்ளார்.

கொரோனா வைரஸ் பாதிப்பு காரணமாக நாடு முழுவதும் ஊரடங்கு காலத்தை மே 3 ஆம் தேதி வரையில் நீட்டிப்பு செய்யப்பட்டுள்ளது. பள்ளி, கல்லூரி, பல்கலைக்கழக மாணவர்கள் வீட்டிலிருந்தே கற்றலை தொடர பல்வேறு நடவடிக்கைகள் மேற்கொள்ளப்பட்டு வருகிறது.

இந்த நிலையில், மத்திய மனிதவள மேம்பாட்டுத் துறை அமைச்சர் ரமேஷ் பொக்ரியால், தனது டுவிட்டர் பக்கத்தில் ஒரு பதிவு ஒன்றை இட்டுள்ளார். அதில், ‘உங்களுக்கு தெரியுமா? எந்த விதமான உள்கட்டமைப்பு வசதியும் இல்லாமல், விர்ச்சுவல் லேப் மூலமாக செய்முறைகளை செய்து பார்க்கலாம். ஆக, நீங்கள் ஏன் இதை வீட்டில் இருந்து செய்து பார்க்கக்கூடாது?” இவ்வாறு குறிபிட்டுள்ளார். அத்துடன் காணொளி ஆய்வகம் பார்ப்பதற்கான இணையதள லிங்க்கையும் ஷேர் செய்துள்ளார்.



அதன்படி, www.vlab.co.in என்ற இணையதளம் மூலமாக காணொளி ஆய்வகத்துக்கு தேவையானதை இலவசமாக பெற்றுக் கொள்ளலாம். துறை ரீதியாக, ஒவ்வொன்றுக்கும் தனித்தனியாக செய்முறை வகுப்பு குறிப்புகள் கொடுக்கப்பட்டுள்ளது. அத்துடன், செய்முறைக்கு தேவையான சாப்ட்வேர் இணைக்கப்பட்டுள்ளது. மாணவர்கள் அந்த சாப்ட்வேரை கம்ப்யூட்டரில் இன்ஸ்டால் செய்து, செய்முறைகளை செய்து பாரக்கலாம்.


இது தொடர்பான முழுமையான விவரங்களுக்கு விர்ச்சுவல் லேப் இணையதள பக்கத்துக்குச சென்று பார்க்கவும்.
www.vlab.co.in