தமிழகத்தில் எம்.பி.பி.எஸ்., கட்டணம் ரூ. 2 கோடியாக அதிகரிப்பு!!

தமிழகத்தில் ஒரு மாணவரின் எம்.பி.பி.எஸ். மருத்துவப் படிப்புக்கான கட்டணம் ரூ. 2 கோடியாக அதிகரித்துள்ளது.

கடந்த 17ஆம் தேதி மருத்துவ நுழைவுத் தேர்வுக்கான நீட் தேர்வு முடிவுகளை சிபிஎஸ்சி வெளியிட்ட பின்னர் தமிழகத்தில் தனியார் மற்றும் டீம் பல்கலைக்கழகங்கள் எம்.பி.பி.எஸ்., படிப்புக்கான கட்டணத்தை அதிகரித்துள்ளது. தமிழகத்தில் உள்ள சிறந்த மருத்துவக் கல்லூரிகள் அல்லது டீம் பல்கலைக்கழங்களில் மருத்துவப் படிப்புக்கான டியூசன் கட்டணம் ரூ. 1.85 கோடி முதல் ரூ. 1 கோடி ரூபாய் வரை அதிகரித்துள்ளது. கேபிடேசன் கட்டணம் ரூ. 85 லட்சமாக அதிகரித்துள்ளது. அனைத்து தனியார் மற்றும் டீம் பல்கலைக்கழங்கள் மெரிட் அடிப்படையில்தான் மாணவர்களை சேர்க்க வேண்டும்.

தற்போதைய புதிய உத்தரவின்படி, மாணவர்கள் தங்கள் இஷ்டப்படி எந்தக் கல்லூரிக்கு வேண்டுமானாலும் விண்ணப்பிக்கலாம். ஆனால், நீட் தேர்வில் பெற்ற மதிப்பெண் அடிப்படையில்தான் கல்லூரி ஒதுக்கப்படும்.

சில கல்லூரிகள் கேபிடேஷன் கட்டணத்தை ரூ. 40 லட்சத்தில் இருந்து ரூ. 85லட்சம் வரை கட்ட வேண்டும் என்று பெற்றோரிடம் தெரிவித்துள்ளது. பெற்றோர்கள் விளக்கம் கேட்டால், கட்டணம் நிர்ணயிக்க உச்சநீதிமன்றம் எந்த உத்தரவையும் பிறப்பிக்கவில்லை என்று கூறுவதாக செய்தி வெளியாகியுள்ளது.

உதாரணத்திற்கு சென்னையில் உள்ள எஸ்ஆர்எம் கல்லூரியின் 2014ஆம் ஆண்டு டியூசன் கட்டணம் ரூ. 9 லட்சமாக இருந்துள்ளது. இதுவே, 2015ல் ரூ. 10 லட்சமாகவும், நடப்பாண்டில் ரூ. 21லட்சமாகவும் அதிகரித்துள்ளது. இதில் ரூ. 2 லட்சம் வளர்ச்சிக் கட்டணமாகவும், ரூ. 1 லட்சம் பல்வேறு கல்விக் கட்டணங்களாகவும் வசூலிக்கப்படுகிறது என்பது தெரிய வந்துள்ளது.