2020ம் ஆண்டுக்கான நீட் தேர்வு மைய விபரங்கள் வெளியீடு!

நேஷனல் டெஸ்டிங் ஏஜென்சி அதாவது என்.டி.ஏ, 2020 ம் ஆண்டின் நீட் தேர்வுக்கான தேர்வு மைய விவரங்களை வெளியிட்டுள்ளது. இந்த நீட் நுழைவுத் தேர்வுக்கு தயாராகும் மாணவர்கள், தங்கள் தேர்வு மையம் பற்றிய விவரங்களை என்.டி.ஏ வின் அதிகாரப்பூர்வ தளமான ntaneet.nic.in இல் சரிபார்க்கலாம். ஹால் டிக்கெட் பற்றிய அறிவிப்புகள் விரைவில் இந்த தளத்தில் வெளியிடப்படும் என்று எதிர்பார்க்கப்படுகிறது.

இந்த வருட நீட் தேர்வு செப்டம்பர் 13, 2020 அன்று நடத்தப்படுவதாக உள்ளது. இந்த கொரோனா தொற்றுநோய் காலத்தில் கூட பல மாணவர்கள் தொடர்ந்து நீட்தேர்வு நடத்துவதற்கு எதிர்ப்பு தெரிவித்து போராடி வருகின்றனர். தேர்வை ரத்து செய்யுமாறு பெற்றோர்கள் மற்றும் மாணவர்கள் பல்வேறு மனுக்களை நீதிமன்றங்களில் தாக்கல் செய்து இருந்தனர், ஆனால் இது எல்லாம் ஆகஸ்ட் 18 அன்று உச்ச நீதிமன்றத்தால் நிராகரிக்கப்பட்டது.

கடந்த வாரம் என்.டி.ஏ வெளியிட்ட அறிவிப்பில், மாணவர்களுக்கு தேர்வு நடத்தப்படும் ஊர்களின் விவரங்கள் அதற்கான அதிகாரப்பூர்வ இணையதளத்தில் முன்கூட்டியே தெரிவிக்கப்படும் என்று கூறப்பட்டுள்ளது. மாணவர்களுக்கு கடைசி நிமிட பதற்றங்களை தவிர்க்க இந்த ஏற்பாடு செய்யப்பட்டுள்ளது. இந்த கொரோனா ஊரடங்கு காலத்தில் மாணவர்கள் பயணிக்க வேண்டியிருப்பதால், தேர்வு மையங்கள் பற்றிய விவரங்கள் முன்கூட்டியே அறிவிக்கப்படுவது அவர்களுக்கு உதவியாக இருக்கும்.

செப்டம்பர் மாதம் நடத்தப்படும் நீட் தேர்வுக்கான விரிவான பாதுகாப்பு திட்டத்தையும் ஏஜென்சி வெளியிட்டுள்ளது. தொற்றுநோய் தொடர்பாக வழங்கப்பட்ட பல்வேறு அறிவுறுத்தல்கள், வழிகாட்டுதல்கள் மற்றும் உத்தரவுகளின் அடிப்படையில் விரிவான திட்டங்களும், முன்னெச்சரிக்கை ஏற்பாடுகளும் செய்யப்பட்டுள்ளது.

இதற்கிடையில், இந்த நீட் தேர்வை இதற்கு மேலும் ஒத்திவைக்க முடியாது என இந்த ஏஜென்சி உச்சநீதிமன்றத்தில் தெளிவாக கூறியுள்ளது.இதற்கு மேலும் ஒத்திவைத்தால் பல்வேறு பிரச்சனைகள் வரும் என்று அவர்கள் நீதிமன்றத்தில் தெரிவித்துள்ளார்கள்.