பல்கலை, கல்லூரிகளுக்கு நாளை முதல் விடுமுறை!

கிறிஸ்துமஸ், புத்தாண்டு மற்றும் உள்ளாட்சி தேர்தல் அடுத்தடுத்து வருவதால், நாளை (டிச.21) முதல் ஜனவரி 1 ஆம் தேதி வரையில் கல்லூரிகள், பல்கலைக்கழகங்களுக்கு விடுமுறை அறிவிக்கப்பட்டுள்ளது.

குடியுரிமை சட்டத்தை எதிர்த்து தமிழகத்தில் பல்வேறு பல்கலைக்கழகங்கள், கல்லூரிகளில் மாணவர்கள் போராட்டம் நடத்தி வருகின்றனர். இதன் எதிரொலியாக தமிழகத்தில் சில கல்லூரிகளில் டிசம்பர் 24 ஆம் தேதி முதல் ஜனவரி 1 வரையில் விடுமுறை அறிவிக்கப்பட்டது. சென்னைப் பல்கலைக்கழகத்தில் டிசம்பர் 18 ஆம் தேதி முதலே விடுமுறை அறிவிக்கப்பட்டுள்ளது.

இந்த நிலையில், கிறிஸ்துமஸ், உள்ளாட்சித் தேர்தல், புத்தாண்டு முன்னிட்டு தமிழகத்தில் உள்ள அனைத்து பல்கலைக்கழகங்கள், கல்லூரிகளுக்கும் நாளை முதல் ஜனவரி 1 ஆம் தேதி வரையில் விடுமுறை அறிவிக்கப்பட்டுள்ளது. இது தொடர்பாக தொழில்நுட்பக்கல்விக்கழகம் கல்லூரி கல்வி இயக்ககம், அனைத்துப் பல்கலைக்கழகங்களுக்கும் சுற்றறிக்கை அனுப்பப்பட்டுள்ளது.

அதன்படி, டிசம்பர் 25 கிறிஸ்துமஸ், ஜனவரி 1 புத்தாண்டு தினத்துக்கு ஏற்கனவே விடுமுறை உள்ளது. இதன் இடைப்பட்ட நாட்களில் ஊரக உள்ளாட்சித் தேர்தல் நடைபெறுவதால், ஒட்டு மொத்தமாக நாளை முதல் ஜனவரி 1 ஆம் தேதி வரையில் கல்லூரிகள், பல்கலைக்கழகங்களுக்கு விடுமுறை அளிக்கப்பட்டுள்ளது. மேலும், தற்போதுள்ள வேலைநாட்களை ஈடு செய்யும் வகையில், சனிக்கிழமைகளில் வகுப்புகள் நடத்திக் கொள்ளும்படி தெரிவிக்கப்பட்டுள்ளது.