மருத்துவ விண்ணப்பங்களை சமர்ப்பிக்க இன்றே கடைசி நாள்!

எம்.பி.பி.எஸ். மற்றும் பி.டி.எஸ்., மருத்துவ படிப்புகளில் சேருவதற்கான விண்ணப்பங்களை சமர்ப்பிக்க, இன்று கடைசி நாளாகும்.

தமிழகத்தில் அரசு மற்றும் தனியார் மருத்துவக் கல்லுாரிகளில் உள்ள, அரசு மற்றும் தனியார் ஒதுக்கீட்டு இடங்களுக்கு, மாணவர் சேர்க்கைக்கான விண்ணப்பங்கள் கடந்த ஜூன் 11-ஆம் தேதி முதல் விநியோகம் செய்யப்பட்டன. இந்த நிலையில் கடைசி நாளான நேற்று, அரசு மருத்துவ இடங்களுக்கு, 798; தனியார் கல்லுாரிகளில் நிர்வாக ஒதுக்கீட்டுக்கு, 512 என, 1,310 விண்ணப்பங்கள் விநியோகம் செய்யப்பட்டன.

எட்டு நாட்கள் நடைபெற்ற விண்ணப்ப விநியோகத்தில், அரசு இடங்களுக்கு, 24 ஆயிரத்து, 933 விண்ணப்பங்களும், நிர்வாக ஒதுக்கீட்டுக்கு, 13 ஆயிரத்து, 338 விண்ணப்பங்களும் என மொத்தம், 38 ஆயிரத்து, 271 விண்ணப்பங்கள் விநியோகிக்கப்பட்டுள்ளன.

இந்த நிலையில் பூர்த்தி செய்யப்பட்ட விண்ணப்பங்களை தாக்கல் செய்ய, இன்று கடைசி நாளாகும். சமர்ப்பிக்‍கப்பட்ட விண்ணப்பங்கள் பரிசீலிக்‍கப்பட்டு, வரும் 28ம் தேதி தரவரிசைப் பட்டியல் வெளியிடப்படும். அடுத்த மாதம் 1-ஆம் தேதி முதல் 5-ஆம் தேதி வரை முதல்கட்ட கலந்தாய்வு நடைபெறும் என அறிவிக்‍கப்பட்டுள்ளது.