நெட் தேர்வுக்கான ஹால் டிக்கெட் இணையதளத்தில் வெளியீடு!

சிபிஎஸ்இ நடத்தும் நெட் தேர்வுக்கான ஹால் டிக்கெட் இணையதளத்தில் வெளியிடப்பட்டுள்ளது.

அரசு மற்றும் அரசு உதவி பெறும் கல்லூரி மற்றும் பல்கலைக்கழகங்களில் உதவிப் பேராசிரியர் பணி மற்றும் உயர் கல்வி நிறுவனங்களில் இளநிலை ஆராய்ச்சி உதவித் தொகை பெறுவதற்காக ஆண்டுக்கு இரண்டு முறை தேசிய அளவிலான நெட் தகுதித் தேர்வு நடத்தப்படுகிறது. அதன்படி, இந்தாண்டுக்கான நெட் தேர்வு வரும் ஜுலை 8-ஆம் தேதி நடைபெற உள்ளது.

தமிழகத்தில் சென்னை, கோவை, மதுரை, திருச்சி ஆகிய நான்கு நகரங்களில் இந்த தேர்வு நடக்க உள்ளது. இத்தேர்வுக்கு விண்ணப்பித்தவர்களுக்கான ஹால் டிக்கெட், சிபிஎஸ்இ இணையதளத்தில் பதிவேற்றம் செய்யப்பட்டுள்ளது.

விண்ணப்பதாரர்கள் www.cbse.nic.in என்ற இணையதளத்தில், விண்ணப்ப எண் மற்றும் பிறந்த தேதியை குறிப்பிட்டு தங்களுக்கான ஹால் டிக்கெட்டை ஆன்லைனில் பதிவிறக்கம் செய்துகொள்ளலாம் என்று சிபிஎஸ்இ அறிவித்துள்ளது.