ஞாபகம் இருக்கும் வகையில் எப்படி படிக்க வேண்டும்?

10,11,12 ஆம் வகுப்புகளுக்கு பொதுத்தேர்வு நெருங்கிக் கொண்டிருக்கிறது. இது முக்கியமான காலக்கட்டம். பெரும்பாலானோர் நன்றாக படித்தாலும், தேர்வு எழுதும் போது, படித்தது எதுவும் ஞாபகம் வராது. மாணவிகளைக் காட்டிலும் மாணவர்களுக்கு தான் இந்த பிரச்னை பொதுவாக ஏற்படும்.

அந்தவகையில், தேர்வுக்கு எப்படி படிக்க வேண்டும், எப்படி படித்தால் ஞாபகம் இருக்கும், தேர்வு எழுதும் போது படித்ததை எப்படி ஞாபகத்துக்கு கொண்டு வரலாம் என்பதை பார்ப்போம்.

என்ன படிக்க வேண்டும் என்பதை முதலில் திட்டமிட்டுக் கொள்ளுங்கள். ஒவ்வொருவரும் ஏதோ ஒரு பாடத்தில் கண்டிப்பாக ஆர்வமிக்கவராக இருப்பர். எனவே, உங்களுக்கு எந்த பாடம் அதிகம் பிடிக்கும் என்பதை உணர்ந்து முதலில் அதை படித்து விடுங்கள். சிலர் ஆர்வ மிகுதி காரணமாக, அதே பாடத்தை மீண்டும் மீண்டும் படிப்பர். அதுவும் தவறு. நமக்கு நேரமேலாண்மை மிகமுக்கியமானது. ஒன்றுக்கு இரண்டு முறை படித்து விட்டால், உடனே அடுத்த பாடத்துக்கு செல்ல வேண்டும்.

புரியாத பாடங்களை எழுதி, வரைந்து பாருங்கள்

மற்ற பாடங்களை விட அறிவியல், கணிதம் பலருக்கு சிரமமாக இருக்கும். அவற்றில் கடினமான பகுதியை எளிதாக்க நீங்களே உங்களுக்குள் ஒரு மனக்கணக்கு போட்டு பாருங்கள். குறிப்பாக சூத்திரம் (Formula), இயந்திர செயல்பாடு, வேதியியல் வாய்பாடு போன்றவைகளை பேப்பரில் அடிக்கடி எழுதி பாருங்கள். சூத்திரங்களை படிப்பதை விட, அவற்றை எழுதி பார்ப்பதே சாலச்சிறந்தது.