ராஜஸ்தான் தேர்தல் முடிவுகள்: பாஜகவை அடிச்சு தூக்கிய காங்கிரஸ் - லேட்டஸ்ட் களநிலவரம்!

நாடு முழுவதும் மிகுந்த எதிர்பார்ப்பை ஏற்படுத்தியுள்ள விஷயம் 5 மாநிலத் தேர்தல் முடிவுகள். அதில் மத்தியப் பிரதேசம், ராஜஸ்தான், சத்திஸ்கர், தெலுங்கானா, மிசோரம் ஆகியவை அடங்கும். இவற்றின் வாக்கு எண்ணிக்கை இன்று காலை 8 மணிக்கு தொடங்கி நடைபெற்று வருகிறது.

ராஜஸ்தான் மாநிலத்தில் 200 சட்டமன்ற தொகுதிகள் இருக்கின்றன. இதற்கு கடந்த 7ஆம் தேதி தேர்தல் நடைபெற்றது. ஆல்வார் மாவட்டம் ராம்கார் தொகுதியில் பகுஜன் சமாஜ் கட்சி வேட்பாளர் மாரடைப்பால் மரணமடைந்தார். இதனால் அந்த தொகுதிக்கு மட்டும் தேர்தல் நடைபெறவில்லை.

ராஜஸ்தான் மாநிலத்தில் ஆட்சியைப் பிடிக்க, 101 தொகுதிகளை கைப்பற்ற வேண்டும். தேர்தலுக்கு பிந்தைய கருத்துக் கணிப்புகளில் பெரும்பாலானவை காங்கிரஸ் கட்சிக்கு சாதகமாகவே இருக்கின்றன. இது ஆளும் வசுந்தரா ராஜே சிந்தியா தலைமையிலான பாஜகவிற்கு பெரும் அதிர்ச்சியை ஏற்படுத்தியது.

இந்நிலையில் சமீபத்திய ECI டிரெண்ட்ஸ் நிலவரப்படி, காங்கிரஸ் 99, பாஜக 79, பகுஜன் சமாஜ் 2, சிபிஎம் 2, பிற கட்சிகள் 16 தொகுதிகளில் முன்னிலையில் உள்ளனர்.

எனவே வசுந்தரா ராஜேவின் பாஜக ஆட்சி முடிவுக்கு வருவது தெளிவாகியுள்ளது. காங்கிரஸ் கட்சி சார்பில் ஏற்கனவே இருமுறை அசோக் கெஜ்லாத் முதலமைச்சராக பதவி ஏற்பார் என்று கூறப்படுகிறது. இருப்பினும் காங்கிரஸ் உயர்மட்டக் குழு கூடி, ராஜஸ்தானில் அடுத்த முதலமைச்சர் யார் என்பதை முடிவு செய்யும்.

ராஜஸ்தான் மாநிலத்தில் கடந்த 25 ஆண்டுகளாக காங்கிரஸ், பாஜக ஆட்சி மாறி, மாறி நடந்து வருவது குறிப்பிடத்தக்கது.