இன்னொரு மக்கள் நலக் கூட்டணி? திமுகவுக்கு புதிய தலைவலி!

கூட்டணியைத் தொடங்கிய கையோடு இன்று சமக தலைவர் சரத்குமார், ஐஜேக பொதுச் செயலாளர் ரவிபாபு ஆகியோர் மக்கள் நீதி மய்யம் கட்சித் தலைவர் கமல்ஹாசனை அவரது கட்சி அலுவலகத்தில் சந்தித்தனர். மாற்றத்துக்கான கூட்டணியில் மக்கள் நீதி மய்யம் கட்சி இணைய வேண்டும் என அழைப்பு விடுத்துள்ளார். ஒத்த கருத்துள்ளவர்கள் இணைந்து இந்த கூட்டணியை அமைக்க உள்ளதாக சரத்குமார் செய்தியாளர்களிடம் பேசினார். இதில் பல்வேறு கட்சிகளை இணைத்து தேர்தலுக்கு பிறகு முதல்வரை முடிவு செய்வோம் என்று கூறியுள்ளார்.

இந்தக் கூட்டணியில் இணைய வலியுறுத்தி அம்மா மக்கள் முன்னேற்றக் கழகம், நாம் தமிழர் ஆகிய கட்சிகளிடமும் பேச்சுவார்த்தைகள் நடைபெற்று வருவதாக கூறுகிறார்கள். ஜெயலலிதா, கலைஞர் கருணாந்தி மறைந்த பின் நடைபெறும் முதல் சட்டமன்றத் தேர்தல் இது என்பதால் இந்த முறை அதிகளவிலான முதல்வர் வேட்பாளர்கள் வலம் வருகின்றனர். அதிமுக, திமுக கூட்டணியை தவிர்த்து டிடிவி தினகரன், கமல்ஹாசன், சீமான் ஆகியோர் தனித்தனி ரூட்டில் ஆட்சியை பிடிக்க பிரச்சாரம் மேற்கொண்டு வருகின்றனர்.

1 முதல் 8 வரை ஆல் பாஸ் அறிவிப்பு வெளியாகிறதா?

இந்நிலையில் இவர்களை எல்லாம் ஒரே கூடாரத்தில் இணைக்க முயற்சிகள் நடைபெற்றுவருவதாக கூறப்படுகிறது. மூன்றாவது அணியை வலுவாக அமைப்பதன் மூலம் யாருக்கு பலன், யாருக்கு நஷ்டம் என்று அரசியல் விமர்சகர்கள் மத்தியில் பேசினோம். அவர்கள் சொல்வது “இப்படி ஒரு கூட்டணி அமைந்து போட்டியிட்டால் பெரும்பாலான இடங்களில் இல்லை என்றாலும் கணிசமான இடங்களில் வெற்றி பெற்றுவிடும் என்றும் சொல்வதற்கு இல்லை. இந்தக் கட்சிகளுக்கு சொற்ப அளவிலேயே வாக்கு வங்கிகள் உள்ளன. அவை அனைத்தும் இணைந்தாலும் திமுக, அதிமுகவை வீழ்த்தும் அளவுக்கு வர முடியாது”

“அதே சமயம் இந்த கூட்டணி அமைந்தால் வாக்குகளை பிரிப்பதில் முக்கிய பங்கு வகிக்கும். ஆளும் கட்சிக்கு எதிரான வாக்குகளை இந்தக் கட்சிகள் குறிவைக்கும். அப்படி நடந்தால் திமுகவுக்கு எதிராக முடியும். 2016 சட்டமன்றத் தேர்தலில் மக்கள் நலக் கூட்டணி அமைந்து திமுகவின் வெற்றி வாய்ப்பை பெரியளவில் பாதித்தது. அதே போன்ற தாக்கத்தை ஏற்படுத்தும் நோக்கில் இந்த கூட்டணி தொடங்கப்பட்டிருக்கலாம்” என்று சந்தேகம் தெரிவிக்கின்றனர்.

கௌதமி VS ராஜேந்திர பாலாஜி: வண்டியைத் திருப்பிய கேடிஆர், வழி மறித்த எடப்பாடி

திமுக இந்த தேர்தலில் கட்டாயம் வெற்றி பெறும் என சில கருத்துக் கணிப்புகள் வெளியாகின. அதேபோல் உளவுத்துறை மூலம் டெல்லி சென்றுள்ள ரிப்போர்ட்டிலும் திமுகவுக்கு சாதகமாக தேர்தல் முடிவுகள் இருக்கும் என்றே கூறப்பட்டுள்ளது. ஆனால் திமுகவை ஆட்சிக் கட்டிலில் அமரவிடக்கூடாது என்பதற்காக என்னென்ன முயற்சிகளை மேற்கொள்ள வேண்டுமோ அத்தனை காரியங்களையும் ஆளும் கட்சிகள் மேற்கொண்டுள்ளன. அவர்களது முயற்சிக்கு வலு சேர்க்கும் விதமாக மாற்றத்துக்கான கூட்டணி உருவாகுவதாக விமர்சனங்கள் எழுகின்றன.