எதிர்க்கட்சி அந்தஸ்தை இழக்கிறதா காங்கிரஸ்?

நாட்டின் 17வது மக்களவைத் தேர்தல் முடிவில் பாஜக அபரிதமான வெற்றி பெற்று மீண்டும் ஆட்சியைப் பிடிக்கிறது. பிரதமர் மோடி மீண்டும் பிரதமராகிறார். இந்த நிலையில் கடந்த தேர்தலில் வெறும் 44 தொகுதிகளில் மட்டுமே வெற்றி பெற்ற காங்கிரஸ் கட்சி இந்த முறை எதிர்க்கட்சி வரிசையில் அமர குறைந்தது 55 இடங்களில் வெற்றி பெற்று இருக்க வேண்டும். இதனால், எதிர்க்கட்சி அந்தஸ்தை காங்கிரஸ் இழக்கிறதா?

கடந்த 2014 மக்களவைத் தேர்தலில் பாஜக கட்சி பிரதமர் மோடி அலையின் மூலம் 282 இடங்களில் வெற்றி பெற்று ஆட்சி அமைத்து இருந்தது. இந்த முறையும் கூட்டணிக் கட்சிகளின் ஆதரவு இன்றி பாஜக ஆட்சி அமைக்கிறது. கடந்த முறை வெற்றி பெற்றதை விட இந்த முறை தனித்தே அதற்கும் அதிகமான வெற்றி பெறும் என்பது தேர்தல் முடிவுகள் மூலம் தெரிய வருகிறது. இதற்குக் காரணம் பாஜகவின் வியூகம் மற்றும் கட்சி தேசியத் தலைவர் அமித் ஷா மிகவும் சாதுரியமாக சமூக ஊடகங்களை கையாண்டது என்று கூறலாம். தேர்தலுக்கு முன்பே அதற்கான பணிகளில் துரிதமாக இறங்கினர். தேர்தல் என்பது வெற்று பிரச்சாரம் மட்டும் கிடையாது. அதையும் தாண்டி வியூகம் என்று ஒன்று இருக்கிறது என்பதை பாஜக நிரூபித்துள்ளது.

இவற்றில் காங்கிரஸ் கோட்டை விட்டது என்றுதான் கூற வேண்டும். பலமான கூட்டணியை அமைக்கவில்லை. மாநிலங்களில் உள்கட்சி பூசல் என்று காங்கிரஸ் இன்னும் நகர்ந்து கொண்டு இருக்கிறது. பாஜகவில் அப்படி இல்லை. தலைமைக்கு கட்டுப்பட்டுதான் மாநிலத் தலைவர்களும் உள்ளனர். இது காங்கிரசில் இல்லை. இவையெல்லாம் தான் காங்கிரசுக்கு சமீபத்திய தேர்தல்களில் தோல்வியை பெற்றுத் தருகிறது. கிராமங்கள் வரை சென்று மக்களை சந்தித்து வாக்குகளை எப்படி வளைக்க வேண்டும் என்ற யுக்தியில் கை தேர்ந்துள்ளது.

கடந்த முறை செய்த அதே தவறுகளை இந்த முறையும் காங்கிரஸ் செய்துள்ளது. முக்கியமானது பலமான கூட்டடணி இல்லை. பாஜக ஆட்சியின் தவறுகள் என்ன என்பதை மக்கள் புரியும்படி எடுத்து செல்லவில்லை. பாஜக ஆட்சியின் குறைபாடுகளை தமிழகத்தில், தமிழக எதிர்க்கட்சிகள் முன்வைத்த அளவிற்கு மற்ற மாநிலங்களில் காங்கிரஸ் எடுத்து வைக்கவில்லை. இதனால், பாஜகவை எதிர்கொள்ள முடியவில்லை.

தற்போது நாடு முழுவதும் 55 இடங்களைப் பெறுமா என்ற சந்தேகம் ஏற்பட்டுள்ளது. மக்களவையில் எதிர்க்கட்சி அந்தஸ்து பெறுவதற்கு காங்கிரஸ் குறைந்தது 55 இடங்களில் வெற்றி பெற்று இருக்க வேண்டும். ஆனால், தற்போதைய நிலைமையைப் பார்க்கும்போது எதிர்க்கட்சி அந்தஸ்தை காங்கிரஸ் பெறுமா என்ற சந்தேகத்தை ஏற்படுத்தியுள்ளது. கடந்த 5 ஆண்டுகளாக பாஜகவை எதிர்த்துப் போராடி வந்த காங்கிரஸ் மீண்டும் அதே நிலைக்கு தள்ளப்பட்டுள்ளது.