384 வாக்குப்பதிவு மற்றும் 692 விவிபாட் இயந்திரங்கள் மாற்றம் - தமிழக தேர்தல் கள நிலவரம்!

நாடு முழுவதும் 2ஆம் கட்ட மக்களவை தேர்தல் நடைபெற்று வருகிறது. காலை 7 மணிக்கு தொடங்கிய வாக்குப்பதிவு விறுவிறுப்பாக நடைபெற்று வருகிறது. தமிழகத்தில் மாலை 5 மணியளவில் 63.73% அளவிற்கு வாக்குகள் பதிவாகியுள்ளன.

வெயிலின் பாதிப்பில் இருந்து தப்பிக்க, காலையிலேயே பெரும்பாலானோர் வாக்களிக்கச் சென்றனர். அதன்படி காலை 11 மணிக்கு பிறகு, வாக்குப்பதிவு படிப்படியாக குறையத் தொடங்கியது.

இதற்கிடையில் செய்தியாளர்களிடம் பேசிய தமிழக தலைமை தேர்தல் அதிகாரி சத்யபிரதா சாஹூ, சில இடங்களில் வாக்குப்பதிவு இயந்திரங்கள் மற்றும் விவிபாட் இயந்திரங்கள் வேலை செய்யவில்லை என்ற குற்றச்சாட்டுகள் வந்தன.

அதன்படி, 384 வாக்குப்பதிவு இயந்திரங்களும், 692 விவிபாட் இயந்திரங்களும் மாற்றம் செய்யப்பட்டுள்ளன. வேறு எந்த பிரச்சனையும் இன்றி, அமைதியாக வாக்குப்பதிவு நடைபெற்று வருகிறது.

ஒரு சில இடங்களில் வேட்பாளர்களுக்கு இடையே வாக்குவாதங்கள் ஏற்பட்டுள்ளன. பெரிய அளவில் அசம்பாவிதங்கள் நடந்ததாக எந்தவித குற்றச்சாட்டுகளும் வரவில்லை என்று கூறினார்.