Wayanad Congress Candidate: கேரளாவில் வெற்றி கிட்டுமா ராகுல் காந்திக்கு? என்ன சொல்கிறது கள நிலவரம்!

அகில காங்கிரஸ் கட்சி தலைவராக இருக்கும் ராகுல் காந்தி, உத்தரப்பிரதேச மாநிலம் அமேதி மக்களவை தொகுதியில் போட்டியிடுகிறார். இந்நிலையில் கேரள மாநிலம் வயநாடு மக்களவை தொகுதியிலும் போட்டியிட முடிவு செய்துள்ளார்.

இதற்காக வரும் 3ஆம் தேதி ராகுல் காந்தி வயநாட்டில் வேட்பு மனு தாக்கல் செய்கிறார். மாற்று வேட்பாளராக காங்கிரஸ் கட்சியின் கே.முரளிதரம் களமிறக்கப்பட உள்ளார். இவரை எதிர்த்து சிபிஐ கட்சியின் பிபி சுனியா போட்டியிடுகிறார்.

முன்னதாக தமிழகத்தில் சிவகங்கை அல்லது கன்னியாகுமரி, கர்நாடகாவில் பீதார், கேரளாவில் வயநாடு ஆகிய தொகுதிகளில் ஒன்றில் ராகுல் காந்தி போட்டியிட திட்டமிடப்பட்டது. இதற்கான வேலைகள் தீவிரமாக நடைபெற்றன.

தமிழகத்தில் களமிறங்கினால் திமுக ஆதரவு தேவை. கர்நாடகாவில் களமிறங்கினால் மதச்சார்பற்ற ஜனதா தள ஆதரவு தேவை. இந்த சூழலில் கேரள மாநிலத்தைச் சேர்ந்த மூத்த காங்கிரஸ் தலைவர்களான அந்தோணி, முள்ளபள்ளி ராமச்சந்திரன், ரமேஷ் சென்னிதலா, உம்மன் சாண்டி ஆகியோர் ராகுலை வயநாட்டில் நிற்க வைக்க திட்டமிட்டனர்.

இதன்மூலம் தென்னிந்தியாவில் காங்கிரஸ் கட்சிக்கு அதிக இடங்கள் கிடைக்கும் என்று நம்பிக்கை கொண்டுள்ளனர். இந்த சூழலில் கேரளாவில் ஆளும் மார்க்சிஸ்ட் கட்சிக்கு ராகுல் அங்கு போட்டியிடுவது பிடிக்கவில்லை என்று கூறப்படுகிறது. எனவே அவரைத் தோற்கடிக்க தீவிரமாக செயல்பட்டு வருகின்றனர்.

கேரள மாநிலத்தில் பாஜகவை ஒட்டுமொத்தமாக விரட்டியடிக்க பல்வேறு கட்சிகளும் ஒன்றிணைந்து செயல்பட திட்டமிட்டுள்ளன. இந்நிலையில் இடதுசாரி வேட்பாளருக்கு எதிராக ராகுல் நிற்பதால், மும்முனைப் போட்டி ஏற்பட்டுள்ளது.

கேரள மாநிலத்தின் வயநாடு மக்களவை தொகுதி, கடந்த 2009ஆம் ஆண்டு உருவாக்கப்பட்டது. இது காங்கிரஸின் கோட்டையாக இருந்து வருகிறது.

கடந்த 2009 மற்றும் 2014 ஆகிய மக்களவை தேர்தல்களில் காங்கிரஸ் கட்சியின் எம்.ஐ.ஷானாவாஸ் போட்டியிட்டு வெற்றி பெற்றுள்ளார். ஆனால் 2018ல் இவரது மறைவிற்கு பின், வயநாடு தொகுதி காலியாக இருந்து வருவது குறிப்பிடத்தக்கது.

எனவே வயநாட்டில் வெற்றி பெறுவது ராகுலிற்கு எளிதாக இருக்கும் எதிர்பார்க்கப்படுகிறது. இருப்பினும் ராகுலை தோற்கடிக்க இடதுசாரிகள் தீவிரம் காட்டி வருவதால், போட்டி பலமாக இருக்கும் என்றும் கூறப்படுகிறது.