ராகுல் காந்தி உரையை மொழிப்பெயர்த்த பழனிதுரை யார்..?? தேடும் நெட்டிசன்கள்..!!

ராகுல் காந்தியின் ஆங்கில உரையை அழகுத் தமிழில் மொழிப் பெயர்த்த பழனிதுரை யார் என்று நெட்டிசன்கள் பலரும் தேடி வருகின்றனர். இதனால் அவர் தொடர்பான செய்திகள் இணையத்தில் வைரலாகி உள்ளன.

கடந்த மாதம் ராகுல் காந்தி தமிழகம் வந்த போது, அவருடைய ஆங்கிலப் பேச்சை தங்கபாலு தமிழில் மொழிப்பெயர்த்தார். அவருடைய மொழிப்பெயர்ப்பு கடும் விமர்சனங்களை சந்தித்தது.

இதனால் தங்கபாலு மொழிப்பெயர்ப்பு உரை குறித்து பல்வேறு மீம்ஸுகள், ட்ரோல்ஸுகள் உருவாகின. இது காங்கிரஸ் தரப்பிலும் அதிருப்தியை ஏற்படுத்தியது. இதனால் சரியான மொழிப்பெயர்ப்பாளரை தேடும் பணியில் தமிழக காங்கிரஸ் களமிறங்கியது.

இந்நிலையில், ராகுல் காந்தி தற்போது தமிழகத்தில் இரண்டாம் கட்ட தேர்தல் பயணம் மேற்கொண்டுள்ளார். இன்று சேலத்திற்கு வந்த ராகுல் காந்தி தேர்தல் பரப்புரை கூட்டத்தில் பேசினார். அப்போது அவருடைய ஆங்கில உரையை பழனிதுரை என்பவர் அழகுத் தமிழில் மொழிப் பெயர்த்தார்.

ராகுல் காந்தியின் உரைக்கு இணையாக இவருடைய தமிழ் மொழிப்பெயர்ப்பு பலரது கவனத்தை ஈர்த்தது. இதனால் பழனிதுரை என்பவர் யார்? காங்கிரஸ் கட்சிக்கும் அவருக்கு என்ன சம்மந்தம்? என்று நெட்டிசன்கள் உடனே தேட தொடங்கினர்.

இதனால் சில மணிநேரங்கள், சமூகவலைதளங்களில் பழனிதுரை வைரலானார். மேலும், அவர் தொடர்பான விவரங்களும் கேள்விகளும் பலரால் பகிரப்பட்டது. தொடர்ந்து அவரது தமிழுக்கு வாழ்த்துக்கள் குவிந்தன.

பழனிதுரை, காந்திகிராம் பல்கலைக்கழகத்தில் பேராசிரியராக பணியாற்றியவர். தற்போது ஓய்வு பெற்றுவிட்ட நிலையில், தமிழ் மொழியை டிஜிட்டல் தளத்திற்கு எடுத்துச் செல்லும் முயற்சிகளில் ஈடுபட்டு வருகிறார். அவருடைய பல ஆண்டு தமிழ் மொழி மீதான அனுபவம் ராகுலின் ஆங்கில உரையையும் விஞ்சும் அளவுக்கு சென்றுவிட்டது.

இனி ராகுல் காந்தி தமிழகம் வரும் போது, ஓய்வு பெற்ற பேராசிரியர் பழனிதுரையே தமிழ் மொழிப்பெயர்ப்பாளராக செயல்படுவார் என்று தகவல்கள் வெளியாகின. எனினும், இன்றைய தேனி மற்றும் மதுரை கூட்டத்தில் ராகுல் காந்தி ஆங்கில உரையை காங்கிரஸின் மூத்த தலைவர் பீட்டர் அல்ஃபோன்ஸ் தமிழில் மொழிப்பெயர்த்தார்.