5 ஆண்டுகளில் 336 சதவீதம் அதிகரித்த சுதீஷின் சொத்து மதிப்பு- வேட்பு மனுவில் தகவல்

கடந்த 5 ஆண்டுகளில் கள்ளக்குறிச்சி தேமுதிக வேட்பாளர் சுதீஷின் அசையும் சொத்துகளின் மதிப்பு 336 சதவீதம் வரை அதிகரித்துள்ளது அவர் தாக்கல் செய்த வேட்பு மனு மூலம் தெரியவந்துள்ளது.

கள்ளக்குறிச்சி தொகுதியில் போட்டியிட தேமுதிக தலைவர் விஜயகாந்தின் மைத்துனரான சுதீஷ் வேட்பு மனு தாக்கல் செய்துள்ளார். அதில் தன் பெயரிலும், தனது குடும்பத்தினர் பெயரிலும் ரூ. 60.17 கோடி அளவில் சொத்து மதிப்பு உள்ளதாக குறிப்பிட்டுள்ளார்.

அதில், சுதீஷின் அசையும் சொத்துக்களின் மதிப்பு ரூ. 17.18 கோடி என குறிப்பிடப்பட்டுள்ளது. மேலும், அசையா சொத்துக்களின் மதிப்பு ரூ. 42.99 கோடியாக உள்ளது.

2014ம் ஆண்டில் சேலம் மக்களவைத் தேர்தலில் தேமுதிக வேட்பாளராக சுதீஷ் களம் கண்டார். அப்போது தன் பெயரிலும் குடும்பத்தினர் பெயரிலும் ரூ. 33.91 கோடி அளவில் சொத்துக்கள் இருப்பதாக வேட்பு மனுவில் தெரிவித்திருந்தார்.

இதை தற்போது தாக்கல் செய்யப்பட்டுள்ள வேட்பு மனு உடன் ஒப்பிடும் போது, சுதீஷ் மற்றும் குடும்பத்தினரின் சொத்து மதிப்பு 77 சதவீதமாக உயர்ந்துள்ளது. இதில் 2014 உடன் ஒப்பிடும் போது அசையா சொத்துகளின் மதிப்பு 336 சதவீதம் அதிகரித்துள்ளது தெரியவந்துள்ளது.

மேலும், 2013-14, 2017-18 நிதியாண்டில் சுதீஷ் தாக்கல் செய்துள்ள நிதியாண்டு கணக்கில், தனது வருவாய் 53 சதவீதமும் மனைவியின் வருவாய் 95 சதவீதம் குறைந்துள்ளது என குறிப்பிட்டுள்ளார். தவிர, கையிருப்பாக ரூ. 45 லட்சமும், தனது மனைவியிடம் ரூ. 3 லட்சம் மற்றும் 45 பவுன் தங்க நகைகள் வைத்திருப்பதாகவும் சுதீஷ் வேட்பு மனுவில் கூறியுள்ளார்.