அதிமுகவில் 30 பெண் வேட்பாளர்கள்!!

தமிழகத்தில் அதிமுக சார்பில் 30 பெண் வேட்பாளர்கள் களம் இறக்கப்பட்டுள்ளனர்.

தமிழக தேர்தல் களம் தற்போது சூடு பிடித்து வருகிறது. தமிழக பாஜக முதன் முதலாக வேட்பாளர் பட்டியலை வெளியிட்டது. இந்தப் பட்டியலில் முக்கிய வேட்பாளர்களாக எச்.ராஜாவும், வானதி சீனிவாசனும் இடம் பெற்று இருந்தனர்.

இந்நிலையில் இன்று தமிழகத்தில் முக்கிய மற்றும் ஆளும் கட்சியான அதிமுக அனைத்து தொகுதிகளுக்கும் அதாவது அதிமுக போட்டியிடும் 227 தொகுதி மற்றும் தோழமை கட்சிகள் போட்டியிடும் 7 தொகுதிகளின் பட்டியலை வெளியிட்டது.

அதிமுக வேட்பாளர் பாட்டியலில் 30 பெண்கள் இடம் பெற்றுள்ளனர். சமீபத்தில் நடந்து முடிந்த தமிழக சட்டசபைக் கூட்டத்தில் உள்ளாட்சி அமைப்புகளில் பெண்களுக்கு 50 சதவீத இட ஒதுக்கீடு வழங்கும் திருத்த மசோதாவை அதிமுக நிறைவேற்றியது. இந்த மசோதா திருத்தத்தின் மூலம் உள்ளாட்சி அமைப்புகளில் 50 சதவீதம் பெண் நிர்வாகிகளும் இடம் பெறுவார்கள்.

இந்நிலையில், இன்றைய பட்டியலில் இதுவரை இல்லாத அளவிற்கு பெண்களுக்கு அதிமுக 30 இடங்களை வாரி வழங்கியுள்ளது. இதன் மூலம் பெண்களின் வாக்குகளை பெற அதிமுக திட்டமிட்டுள்ளது தெளிவாகியுள்ளது. தற்போது அமைச்சர்களாக இருந்து வரும் கோகுல இந்திரா, வளர்மதிக்கு மீண்டும் வாய்ப்பு வழங்கப்பட்டுள்ளது.