பாஜக வேல் யாத்திரையில் சிக்கிய கர்ப்பிணி பயணித்த ஆம்புலன்ஸ்? - டென்ஷனான எல்.முருகன்!

தமிழக பாஜக தலைவர் எல்.முருகன் தலைமையில் சென்னையில் நேற்று ( நவம்பர் 8) தடைமீறி வேல் யாத்திரை மேற்கொள்ளப்பட்டது. கோயம்பேட்டில் இருந்து திருவொற்றியூர் வரை பாஜகவினர் யாத்திரை மேற்கொண்டனர்.

இந்த யாத்திரையின்போது எல். முருகன் உள்ளிட்ட பாஜகவினர் பயணித்த வாகனங்கள் பூந்தமல்லி நெடுஞ்சாலையில் அண்ணா ஆர்ச், பச்சையப்பன் கல்லூரி, எழும்பூர், சென்ட்ரல் வழியாக திருவொற்றியூர் சென்றடைந்தது.

அவர்களின் வாகனங்கள் பூந்தமல்லி நெடுஞ்சாலையில் பெரியமேடு -சென்ட்ரல் சந்திப்புக்கு அருகே வந்து கொண்டிருந்தபோது எல். முருகனின் வாகனத்துடன் பாஜகவினரின் பல வாகனங்களும் கூடவே பயணித்ததால் அப்பகுதியில் கடும் போக்குவரத்து நெரிசல் ஏற்பட்டது.

வேல் யாத்திரைக்கு தடை: என்ன சொல்கிறார் ஹெச். ராஜா?!

அப்போது கர்ப்பிணி பெண் ஒருவரை ஏற்றிக்கொண்டு மருத்துவமனைக்கு அவசரமாக பயணித்து கொண்டிருந்த 108 ஆம்புலன்ஸ் வாகனம் போக்குவரத்து நெரிசலில் சிக்கிய வீடியோ காட்சிகள் தற்போது வெளியாகி பெரும் பரபரப்பை ஏற்படுத்தியுள்ளது.

பூந்தமல்லி நெடுஞ்சாலையில் பாஜகவினரின் வாகனங்களுக்கு மத்தியில் பயணித்த அந்த ஆம்புலன்ஸ் பச்சையப்பன் கல்லூரி அருகேயேயும், பெரியமேடு சந்திப்பு அருகேயும் கிட்டதட்ட அரைமணி நேரம் போக்குவரத்து நெரிசலில் சிக்கிய சம்பவம் பெரும் சர்ச்சையை ஏற்படுத்தியுள்ளது.

சிட்டிசன்களுக்கு குட் நியூஸ்... பருவமழைக் காலத்தில் மெல்ல நிரம்பும் ஏரிகள்!

கர்ப்பிணி பெண்ணின் உறவினர், போக்குவரத்து நெரிசலில் சிக்கித் தவிக்கும் ஆம்புலன்ஸ் உடனடியாக பயணிக்க வழிவகை செய்து தரும்படி கர்ப்பிணியின் உறவினர்கள் போலீசாரிடம் முறையிடும் நெஞ்சை உருக்கும் காட்சியும் தற்போது வெளியாகியுள்ளது.

இந்த சர்ச்சை குறித்து செய்தியாளர்கள் கேட்டபோது, " தங்களது வாகனங்களையே போலீசார் அனுமதிக்கவில்லை. குறிப்பிட்ட ஆம்புலன்ஸ் வாகனம் தங்களோட வந்த வாகனம்" எனக்கூறி சமாளித்த தமிழக பாஜக தலைவர் எல்.முருகன், "சும்மா கேள்வி கேட்கணும்னு கேட்கக் கூடாது" என்று டென்ஷன் ஆனப்படி இடத்தைலிட்டு மெல்ல நகர்ந்தார்.