பிரபல கார் ரேஸர் அஷ்வின் சுந்தர் உயிரிழப்பு!

சென்னை : பிரபல கார் ரேஸர் அஷ்வின் சுந்தர் மற்றும் அவரது மனைவி நிவேதிதா ஆகிய இருவரும் கார் விபத்தில் உயிரிழந்தனர்.

அஷ்வினும், அவரது மனைவி நிவேதிதாவும் அதிகாலை எம்.ஆர்.சி நகர் அருகே பி.எம்.டபிள்யூ Z4 காரில் சென்று கொண்டிருந்தனர். அப்போது கார் கட்டுப்பாட்டை இழந்து சாலையோரம் உள்ள மரத்தில் மோதி தீப்பிடித்து எரிந்துள்ளது. காரை விட்டு வெளியே வர முடியாததால் அஷ்வின் சுந்தர் மற்றும் அவரது மனைவி நிவேதிதா சம்பவ இடத்திலேயே உயிரிழந்துள்ளனர். அந்த வழியாக சென்றவர்கள் கார் எரிந்து கொண்டிருப்பதை பார்த்து போக்குவரத்து காவல்துறையினருக்கு தகவல் தெரிவித்துள்ளனர். சம்பவ இடத்திற்கு வந்த காவல்துறையினர் விசாரணை மேற்கொண்டு வருகின்றனர். விரைந்து வந்த தீயணைப்பு துறையினர் 30 நிமிடங்கள் போராடி காரில் ஏற்பட்ட தீயை அணைத்தனர்.

முதலில் காரில் உள்ளவர்கள் யார் என்பதை அடையாளம் காண முடியவில்லை. பின்னர் கார் நம்பரை கொண்டு அடையாளம் காணப்பட்டனர். போரூரில் வசித்து வரும் அஷ்வின் மற்றும் அவரது மனைவி, ராஜா அண்ணாமலைபுரத்தில் உள்ள தங்களின் நண்பரின் வீட்டிற்கு சென்றுவிட்டு திரும்பும் போது இந்த விபத்து ஏற்பட்டுள்ளது. 2003ஆம் ஆண்டு முதல் 2013ஆம் ஆண்டு வரை தொடர்ந்து சாம்பியன் பட்டம் வென்றவர் அஷ்வின். அஷ்வினின் மனைவி நிவேதிதா மருத்துவர் ஆவார். சென்னையில் உள்ள தனியார் மருத்துவமனையில் பணியாற்றி வந்தார்.