கொரோனாவோடு வாழ பழகிட்டாங்களோ? - சென்னையில் மெல்ல திரும்பும் இயல்பு வாழ்க்கை!

கொரோனா பொதுமுடக்கத்தின்போது பொதுமக்களுக்கு விதிக்கப்பட்ட தடை மெரினா கடற்கரையில் இன்றும் தொடர்கிறது. மெரினாவில் பொதுமக்களை மீண்டும் எப்போப்பா அனுமதிப்பீங்க என்று கோர்ட் கேட்கும் அளவுக்கு இந்த விஷயம் போய் கொண்டிருக்கிறது. இது ஒருபுறம் இருக்க, நாங்கதான் கொரோனாவுடன் வாழ பழகிட்டோமே அப்புறம் என்ன எங்களுக்கு பயம்னு சொல்லும்படியாகமெரினாவில் நுரை பொங்கும் அலை நனைந்து குதூகலிக்கிறாள் சிறுமி ஒருத்தி.

கொரோனா பாதிப்புக்கு எளிதில் ஆளாவோரின் பட்டியலில் பத்து வயதுக்குட்பட்ட சிறுவர், சிறுமியர் முக்கிய இடத்தில் உள்ளனர். ஆனால், இந்த எச்சரிக்கையை பற்றியெல்லாம் கவலைப்படாமல், செல்லப் பிராணிகளான நாய் குட்டி, பூனை குட்டியுடன் அன்பு பாராட்டும் சென்னை சிறுவன்.

: ரயில் பயணங்கள் எப்போதும் சுகமானவை. பல மாதகால பொதுமுடக்கத்துக்கு பிறகு செப்டம்பர் முதல் வாரத்தில் இருந்து சென்னையிலிருந்து மாநிலத்தின் பல்வேறு பகுதிகளுக்கு ரயில்கள் இயக்கப்பட்டு வருகின்றன. பாதுகாப்பான ரயில் பயணத்துக்கு தயார் நிலையில் எழும்பூர் ரயில் நிலையத்தில் ஸ்டைலாக நடந்து செல்லும் சிறுமி.

சென்னை மாநகராட்சிக்கு சொந்தமான இரண்டு இடங்களில் எப்போதும் கூட்டம் நிரம்பி வழியும். ஒன்று மாநகராட்சி பூங்காக்கள், இன்னொரு இடம் மாநகராட்சி விளையாட்டு திடல்கள். கொரோனா பரவல் தடுப்பு நடவடிக்கையாக பல மாதங்கள் மூடப்பட்டிருந்த மாநகாட்சி விளையாட்டுத் திடல்கள் அண்மையில் திறக்கப்பட்டன. கொரோனாவெல்லாம் இனிமே எங்களை ஒன்றும் செய்யாது என்பது போல, விளையாட்டுத் திடல்களில் உற்சாகமாய் குவியும் இளைஞர் பட்டாளம்.

சென்னை மாநகரில் அரசு மற்றும் தனியார் நிறுவனங்கள் அனேகமாய் பழைய நிலைக்கு திரும்பி விட்டது என்றுதான் சொல்ல வேண்டும். ஒர்க் ப்ரம் ஹோம் எல்லாம் எங்களுக்கு வேலைக்கு ஆகாது. நாங்க ஆபிசுக்கு போயே ஆக வேண்டும். அப்போதுதான் கம்பெனிக்கு லாபம்னு கெத்தாக சொல்லும் ஆயிரக்கணக்கான பணியாளர்கள் மீண்டும் பணிக்கு செல்ல தொடங்கிவிட்டனர். அவர்களுக்கு கொரோனா தொற்று ஏற்பட்டுள்ளதா என்று அக்கறையுடன் பரிசோதிக்கும் மாநகராட்சி ஊழியர்.