சென்னை மெட்ரோ நீளம் குறைப்பு... 10 நிலையங்களுக்கு ஆப்பு... CMRL கொடுத்த ஷாக்!

சென்னையில் தற்போது 54 கிலோ மீட்டர் தொலைவுக்கு 2 வழித்தடங்களில் மெட்ரோ ரயில் சேவை இயக்கப்பட்டு வருகிறது. பெருகிவரும் மக்கள் தொகை காரணமாக போக்குவரத்து நெரிசல் அதிகானதை கருத்தில் கொண்டு மேலும் 3 வழித்தடங்களில் மெட்ரோ ரயில் சேவை வழங்கும் பணிகள் சென்னையில் மாநகரின் பல்வேறு பகுதிகளில் நடைபெற்று வருகிறது.

சென்னை மெட்ரோவில் மாற்றம்

அதாவது, மாதவரம் - சிறுசேரி சிப்காட், மாதவரம் - சோழிங்கநல்லூர் மற்றும் கலங்கரை விளக்கம் - பூந்தமல்லி ஆகிய 3 வழித்தடங்களில் சுமார் 61 ஆயிரத்து 800 ரூபாய் மதிப்பில் மெட்ரோ பணிகள் நடைபெற்று வருகின்றன. 2026-ம் ஆண்டின் இறுதிக்குள் மெட்ரோ ரயில் சேவையை தொடங்கும் வகையில் அதற்கான வேலைகளை சென்னை மெட்ரோ ரயில் நிறுவனம் முழுவீச்சில் செய்து வருகிறது.

இந்நிலையில், சென்னை பெருநகரத்திற்குள் மேற்கொள்ளப்பட்டுவரும் இரண்டாம் கட்ட மெட்ரோ ரயில் திட்டத்திற்காக ஏற்கனவே முடிவு செய்யப்பட்ட மாற்றத்தில் திருத்தங்கள் மேற்கொள்ளப்பட்டால், அதனை உடனடியாக மெட்ரோ இணையத்தில் பதிவிட வேண்டும் என சென்னை உயர்நீதிமன்றம் அண்மையில் சென்னை மெட்ரோ ரயில் நிறுவனத்திற்கு உத்தரவிட்டிருந்தது.
சென்னைவாசிகளுக்கு ஹேப்பி நியூஸ் - தீவுத்திடல் திருவிழா மேலும் ஒரு வாரம் நீட்டிப்பு!
புதிய வரைபடத்தில் நீளம் குறைப்பு

அதன்படி, திருத்தப்பட்ட திட்டங்கள் அடங்கிய புது வரைபடத்தை சென்னை மெட்ரோ ரயில் நிர்வாகம் வெளியிட்டுள்ளது. அதில், பல அதிர்ச்சிகரமான தகவல்கள் வெளிவந்துள்ளன. அதன்படி, இந்த திட்டம் முதலில் செயல்படுத்தும்போது 118.9 கிலோ மீட்டர் தொலைவில் பயன்பாட்டிற்கு கொண்டு செல்லப்படும் என தெரிவிக்கப்பட்டிருந்தது. ஆனால், தற்போது 2.8 கிலோ மீட்டர் அளவுக்கு நீளம் குறைக்கப்பட்டிருப்பது தெரியவந்துள்ளது.

அதன்படி, மாதவரம் - சிறுசேரி சிப்காட் இடையே முந்தைய நீளம் 45.8 கிலோ மீட்டராக இருந்தது. தற்போது, அதில் 400 மீட்டர் குறைக்கப்பட்டிருக்கிறது. மேலும், 47 கிலோ மீட்டர் கொண்ட வழித்தடமாக அறிவிக்கப்பட்டிருந்த மாதவரம் - சோழிங்கநல்லூர், தற்போது 44.6 கிலோ மீட்டராக குறைக்கப்பட்டுள்ளது. பூந்தமல்லி - கலங்கரை விளக்கம் வழித்தட நீளத்தில் எந்த மாற்றமும் செய்யப்படவில்லை.

ரயில் நிலையங்கள் குறைப்பு

அதுமட்டுமின்றி, இந்த திட்டம் தொடங்கப்பட்டபோது, 128 ரயில் நிலையங்கள் அமைக்கப்படும் என தெரிவிக்கப்பட்ட நிலையில், தற்போது அந்த எண்ணிக்கை 118 ஆக குறைக்கப்பட்டுள்ளது. இந்த திடீர் மாற்றம் மாதவரம் சுற்றுவட்டார பகுதிகளை சேர்ந்தவர்களிடம் அதிர்ச்சியை ஏற்படுத்தியுள்ளது. அதேநேரத்தில், இந்த வழித்தடத்தில் பயணிகளின் வருகையை பார்த்து திட்டம் நீட்டிக்கப்படும் என்றும் சென்னை மெட்ரோ ரயில் நிறுவன அதிகாரிகள் தரப்பில் தெரிவிக்கப்பட்டுள்ளது.