சென்னை தி நகரில் மீண்டும் தீ விபத்து..!

சென்னை சில்க்ஸ் அருகில் அமைந்துள்ள உணவகத்தில் தீ விபத்து ஏற்பட்டுள்ளது.

சென்னை தி நகரில் அமைந்துள்ள சென்னை சில்க்ஸ் கட்டிடத்தில் தீ விபத்து ஏற்பட்டு, பல கோடி ரூபாய் மதிப்புள்ள பொருட்கள் எரிந்து நாசமாகின. மூன்று நாள் போராட்டத்திற்கு பிறகு முற்றிலும் தீ அணைக்கப்பட்டு, பாதுகாப்பு காரணங்களுக்காக தற்போது அந்த கட்டிடம் இடிக்கப்பட்டு வருகிறது.

இந்நிலையில் இன்று மாலை சென்னை சில்க்ஸ் கட்டிடத்திற்கு அருகில் அமைந்துள்ள பி.கே.ஆர் என்ற உணவகத்தில் , திடீரென தீ விபத்து ஏற்பட்டது. கடந்த சில நாட்களாக மூடப்பட்டிருக்கும் இந்த உணவகத்தின் சமையலறையில் தீப்பற்றியதாக கூறப்படுகிறது. தகவலறிந்து சென்னை சில்க்ஸ் பகுதியில் பணியாற்றி வந்த தீயணைப்புத் துறையினர் , சம்பவ இடத்திற்கு 4 வாகனங்களில் வந்து உடனடியாக அணைத்தனர்.

இந்த தீ விபத்தினால் யாருக்கும் காயம் இல்லை. தீ விபத்திற்கான காரணம் குறித்து விசாரணை நடத்தப்பட்டு வருகிறது. கடந்த சில நாட்களில் சென்னையில் நடைபெற்ற மூன்றாவது தீ விபத்து இதுவாகும்.

Fire accident in a hotel near Chennai silks