குறைவாக மாமுல் கேட்டு சிக்கிக் கொண்ட போலி வருமான வரித்துறை அதிகாரி!

வருமான வரித்துறை அதிகாரியாக நடித்து கணினி உதிரிபாகம் விற்கும் கடை உரிமையாளரிடம் மாமூல் வாங்க முயற்சி செய்த நபரை காவல்துறையினர் கைது செய்துள்ளனர்.

சென்னை மேடவாக்கத்தில் உள்ள ஜெய் பிரகாஷ் தெருவில் கந்தன் என்பவர் கணினி உதிரிபாகங்களை விற்கும் கடை நடத்தி வருகிறார். நேற்று மாலை கடைக்கு வந்த ஒருவர், தன்னை வருமான வரித்துறை அதிகாரி என்று கூறியுள்ளார். மேலும் கந்தனின் கடையில் வருமான வரிசோதனை செய்யப்படும் என்றும் வருமானவரித்துறை அதிகாரிகள் குழுவினர் வருவார்கள் என்றும் கூறியுள்ளார்.

வருமான வரித்துறை சோதனை நடக்காமல் இருக்க தனக்கு மாமூல் கொடுக்க வேண்டும் என்று கேட்டுள்ளார். இதை நம்பிய கடை உரிமையாளர் கந்தன், அதிக பணம் கேட்பார் என்று கருதி பணம் தர அவகாசம் கேட்டுள்ளார். ஆனால் உடனே தருமாறு அந்த நபர் கந்தனை வற்புறுத்தியுள்ளார்.

''அந்த நபர் 3 ரூபாய் கொடுங்க’ என்று கந்தனிடம் கேட்டதும் கந்தன் இவ்வளவு குறைவான தொகை கேட்கிறீர்களே என்று வினவ, ''ரூ.3000 வேண்டும் என்று கேட்டேன்’ என அந்த நபர் பதில் அளித்துள்ளார்.

குறைவான தொகையை கேட்டதால் கந்தனுக்கு அந்த நபர் மீது சந்தேகம் எழுந்துள்ளது. அதனால் அடையாள அட்டையை காண்பிக்குமாறு கேட்டுள்ளார். உடனே அவரின் முக பாவனை மாறியுள்ளது. தப்பிக்க முயற்சி செய்த அந்த நபரை கந்தன் மடக்கிப் பிடித்து காவல்துறையினரிடம் ஒப்படைத்துள்ளார்.

இவரை பள்ளிக்கரனை காவல்துறையினர் கைது செய்து விசாரணை செய்தனர். ‘காவல்துறை விசாரணையில் , அவர் பெயர் பழனிவேல் என்பதும் கீழ்ப்பாக்கம் ஓசாங்குப்பம் பகுதியைச் சேர்ந்தவர் என்பதும் தெரியவந்தது.

இவர் 2001 ஆம் ஆண்டு முதல் 2003 ஆம் ஆண்டு வரை வணிகவரி அலுவலகத்தில் தற்காலிக ஊழியராக பணிபுரிந்துள்ளார். அப்போது எப்படி அதிகாரிகள் நடந்து கொள்வார்களோ அதுபோல் நடந்து கொண்டதாக விசாரணையில் விளக்கம் அளித்துள்ளார்.

மேலும் கந்தனைப்போல் வேறு யாரையாவது ஏமாற்றியுள்ளாரா? என்று காவல்துறையினர் விசாரித்து வருகின்றனர்.