கருணாநிதிக்கு இடம் மறுக்கப்பட்டதால் 77 வாகனங்கள் சேதம்

திமுக தலைவர் கருணாநிதியின் உடலை மெரினாவில் நல்லடக்கம் செய்ய அனுமதி மறுக்கப்பட்டதால் ஏற்பட்ட ஆர்ப்பாட்டத்தில் 77 வாகனங்கள் சேதமடைந்துள்ளன என்று தகவல் வெளியாகியுள்ளது.

திமுக தலைவர் கருணாநிதி 11 நாட்கள் சென்னை காவேரி மருத்துவமனையில் சிகிச்சை பெற்று, சிகிச்சை பலனின்றி செவ்வாயக்கிழமை உயிரிழந்தார். இன்று மாலை சென்னை மெரினா கடற்கரையில் அவரது உடல் நல்லடக்கம் செய்யப்பட்டது.

முன்னதாக ராஜாஜி அரங்கில் அவரது புகழுடம்பு பொதுமக்கள் மற்றும் பிரபலங்களின் அஞ்சலிக்காக வைக்கப்பட்டது. அவருக்கு இரங்கல் தெரிவிக்க ஆயிரக்கணக்கானவர்கள் திரண்டனர்.

அப்போது ஏற்பட்ட கூட்ட நெரிசலில் இரண்டு பேர் உயிரிழந்துள்ளனர் என்று தகவல் வெளியாகியுள்ளது. இந்நிலையில் நேற்று இரவு கருணாநிதிக்கு மெரினாவில் இடம் வழங்கப்படாததை அறிந்த தொண்டர்கள் ஆர்ப்பாட்டத்தில் ஈடுபட்டபோது 77 வாகனங்கள் சேதமடைந்துள்ளன என்று விவரமும் வெளியாகியுள்ளது.