Chennai Rains: சென்னையில் ஹாட்ரிக் அடிக்கும் மழை... சிட்டிசன்ஸ் ஹேப்பி!

மார்கழி மாதம் என்பதால், சென்னை மற்றும் புறநகர் பகுதிகளில் கடந்த சில வாரங்களாக நள்ளிரவு மற்றும் அதிகாலை வேளைகளில் பனிப்பொழிவு இருந்து வந்தது. இந்த நிலையில் யாரும் எதிர்பாராத விதமாக, நேற்றுமுன் (ஜனவரி 5) அதிகாலை முதல் சென்னை மாநகர் மற்றும் புறநகர் பகுதிகளில் தொடர் மழை பெய்தது.

அன்று காலை 10 மணி வரை நகரின் பல்வேறு பகுதிகளில் கனமழை பெய்யும் என்று வானிலை ஆய்வு மையம் தெரிவித்திருந்தது. ஆனால், அந்த கணிப்பையும் மீறி, பிற்பகல் 3 மணி வரை சென்னையில் மழை கொட்டித் தீர்த்தது.

அதன் பின்னர் மழை விட்டதால் மார்கழி மாத இயல்பு நிலைக்கு வானிலை திரும்பும் என்று மாநகரவாசிகள் எண்ணியிருந்தனர். ஆனால், நேற்று காலை முதல் சென்னை மற்றும் புறநகர் பகுதிகளில் விட்டுவிட்டு மழை பெய்தது. நகரின் பல்வேறு பகுதிகளில் நள்ளிரவு வரை மிதமான மழை பெய்தது.

இதன் தொடர்ச்சியாக இன்று காலையும் மாநகர், புறநகர் பகுதிகளில் மழை பெய்து வருகிறது. எனவே இன்றும் மாநகரில் மழைக்கால வானிலையே நிலவும் என்று எதிர்பார்க்கப்படுகிறது.

சென்னை மற்றும் புறநகர் பகுதிகளைப் பொறுத்தவரை இன்றும், நாளையும் வானம் பொதுவாக மேகமூட்டத்துடன் காணப்படும். நகரின் ஒரு சில பகுதிகளில் லேசானது முதல் மிதமான மழை பெய்யக்கூடும். அதிகபட்ச வெப்பநிலை 29 டிகிரி செல்சியஸை ஒட்டியே இருக்கும் என்று வானிலை ஆய்வு மையம் தெரிவித்துள்ளது.