சென்னையில் இன்று மிதமான மழையே இருக்கும்.!

சென்னையில் கனமழை தீவிரமடைந்துள்ள நிலையில், இன்று மிதமான மழையே இருக்கும், இருக்கும் என தமிழ்நாடு வானிலை ஆர்வலர் பிரதீப் ஜான் அறிவித்துள்ளார்.

சென்னையில் நேற்றிரவு விடிய விடிய பெய்த கனமழையால் பல குடியிருப்பு பகுதிகளில் மழைநீர் புகுந்து வெள்ளக்காடாகக் காட்சியளிக்கிறது. நுங்கம்பாக்கம், தரமணி பகுதிகளில் 19 செ.மீ., மழை பெய்தது. தொடர்ந்து பெய்து வரும் கனமழையால் சென்னைவாசிகள் மீண்டும் வெள்ள பீதியில் உறைந்துள்ளனர்.

இந்நிலையில், இன்றைய மழைப்பொழிவுக் குறித்து தமிழ்நாடு வெதர்மேன் மற்றும் வானிலை ஆர்வலர், பிரதீப் ஜான், தனது முகநூல் பக்கத்தில் வெளியிட்டுள்ளார். அதில் அவர் கூறியிருப்பதாவது,

"நேற்று தொடங்கிய பலத்த மழை முடிவுக்கு வந்துவிட்டது. மழை தரும் பெரும் மேகக்கூட்டங்கள் சென்னை கரையைவிட்டு விலகியே நிற்கின்றன. அச்சப்படத் தேவையில்லை. கரையை நெருங்க நெருங்க மேகக்கூட்டங்கள் சிதறும் நிலையே தென்படுகிறது. கரையை நெருங்கும்போது வலுவான மேகக்கூட்டங்கள் எல்லாம் (Stratiform clouds) என்ற அடுக்கியல் வடிவம் கொண்ட மேகக்கூட்டங்களாகவே மாறுகின்றன. இத்தகைய மேகங்களால் மிதமான மழை மற்றும் தூரல்களுக்கே வாய்ப்பிருக்கிறது. இதில் ஏதாவது மாற்றமிருந்தால் உங்களுக்கு உடனே தெரிவிக்கிறேன்.

இப்போதைக்கு சென்னையில் கனமழைக்கு வாய்ப்பில்லை. வெயில் அடித்தாலும்கூட ஆச்சரியப்படுவதற்கில்லை. அதேவேளையில், காற்றழுத்த தாழ்வு நிலை நீடிப்பதால் சென்னைக்கு மழை முடிந்துவிட்டது எனக் கூறிவிடமுடியாது"
இவ்வாறு வானிலை ஆர்வலர் பிரதீப் ஜான் தனது முகநூல் பக்கத்தில் பதிவிட்டுள்ளார்.

Tamilnadu weatherman report about today rain.