கருணாநிதி நிச்சயம் குணமடைந்து வீடு திரும்புவார்: டிடிவி தினகரன்

சென்னை: திமுக தலைவர் கருணாநிதிக்கு நிச்சயம் குணமடைந்து வீடு திரும்புவார் என்று நம்புவதாக அமமுக தலைவர் டிடிவி தினகரன் தெரிவித்துள்ளார்.

சிறுநீரக நோய்த்தொற்று ஏற்பட்டு கடந்த இரண்டு நாள்களாக சென்னை கோபாலபுரம் இல்லத்தில் திமுக தலைவர் கருணாநிதி தொடர் சிகிச்சை பெற்றார். தொடர்ந்து அவரது உடல் நிலையைக் கருத்தில் கொண்டு மருத்துவமனையில் சேர்க்கும் முடிவை மருத்துவ சிறப்புக் குழுவினர் எடுத்தனர்.

கருணாநிதி சிகிச்சை பெற்று வந்த கோபாலபுரம் இல்லத்துக்கு வெள்ளிகிழமை இரவு சுமார் 12. 20 மணிக்கு திமுக செயல் தலைவர் ஸ்டாலின்,அவரது மனைவி துர்கா ஸ்டாலின், டாகடர் கோபால், சென்னை காது-முக்கு– தொண்டை மற்றும் முதியோர் நல மருத்துவ சிறப்புக் குழுவினர் முதலில் வந்தனர்.இதனையடுத்து கருணாநிதியின் உடல் நலம் குறித்து கோபாலபுரத்தில் இருந்த தொண்டர்கள், பத்திரிக்கையாளர்களிடம் பரபரப்பு ஏற்பட்டது.

இதனையடுத்து கடந்த இரண்டு ஆண்டுகளாக கருணாநிதிக்கு சிகிச்சை அளித்து வரும் ஆழ்வார்ப்பேட்டை காவிரி மருத்துவமனைக்கு அம்புலன்ஸ் மூலம் அதிகாலை 1.15 மணிக்கு அவர்அழைத்துச் செல்லப்பட்டு 1.30 மணி அளவில் அனுமதிக்கப்பட்டார்.

இந்நிலையில், அமமுக தலைவர் டிடிவி தினகரன் காவேரி மருத்துவமனைக்குச் சென்று கருணாநிதியின் உடல்நிலை பற்றி விசாரித்தார். பின் பேட்டி அளித்த அவர், "கருணாநிதி உடல்நலம் பெற்று வீடு திரும்ப இறைவனிடம் பிரார்த்திக்கிறேன். நிச்சயம் கருணாநிதி குணமடைந்து வீடு திரும்புவார் என்ற நம்பிக்கை உள்ளது." என்று கூறியுள்ளார்.