நடந்து சென்று வாக்கு சேகரிக்கும் ஸ்டாலின்... தொண்டர்கள் உற்சாகம்

கோவை பொள்ளாச்சி மெயின் ரோடு ஈச்சனாரி விநாயகர் கோவில் அருகே திறந்த வேனில் நின்றபடி தேர்தல் பிரசாரம் செய்த திமுக தலைவர் மு.க.ஸ்டாலின், வேனில் குனியமுத்தூர் பகுதிக்கு சென்றார்.
தொண்டாமுத்தூர் சட்டமன்ற தொகுதிக்கு உட்பட்ட பகுதியான அங்கு, திமுக வேட்பாளர் கார்த்திகேய சிவசேனாபதிக்கு வாக்கு சேகரித்தார்.

பாலக்காடு சாலையில், ஆத்துப்பாலம் சுண்ணாம்பு காளவாய் முதல், குனியமுத்தூர் முத்துசாமி திருமண மண்டபம் வரை சுமார் 2 கி.மீ தூரம் சாலையோரம் நடந்து சென்று வாக்கு சேகரித்தார்.

அவருடன், தொண்டாமுத்தூர் தொகுதி திமுக வேட்பாளர் கார்த்திகேய சிவசேனாபதியும், வடக்கு மாவட்ட பொறுப்பாளர் சிஆர்.இராமசந்திரன் உள்ளிட்டோரும் உடன் சென்றனர்.

திமுக தலைவர் மு.க.ஸ்டாலின் திடீர் வருகையை சற்றும் எதிர்பார்க்காத மக்கள், பெரும் ஆச்சரியத்துடன் அவருக்கு வரவேற்பு அளித்தனர். பலர், மு.க.ஸ்டாலினுடன் ஆர்வத்துடன் கை குலுக்கினர். தங்களது செல்போனில், செல்பி எடுத்துக்கொண்டனர்.

மு.க.ஸ்டாலின் நடந்துசென்று வாக்குசேகரித்த பகுதி, அமைச்சர் எஸ்.பி.வேலுமணி போட்டியிடும் தொகுதி என்பதால், திமுக தொண்டர்கள் பெரும் உற்சாகம் அடைந்தனர்.