கோவையில் தரமான சம்பவம் வெயிட்டிங்; உள்ளாட்சி தேர்தலில் முக்கிய அப்டேட்!

தமிழகத்தில் விரைவில் நகர்ப்புற உள்ளாட்சி தேர்தலுக்கான அறிவிப்பு வெளியாகும் என்று எதிர்பார்க்கப்படுகிறது. இதையொட்டி அரசியல் கட்சிகள் தற்போதே தயாராக தொடங்கிவிட்டன. இந்நிலையில் கடந்த 2021 சட்டமன்ற தேர்தலில் அதிமுகவை பெரிதும் காப்பாற்றிய கொங்கு மண்டலத்தை குறிவைத்து ஆளும் திமுக காய்களை நகர்த்தி வருகிறது. கோவையில் உள்ள 10 சட்டமன்ற தொகுதிகளில் 9 அதிமுக எம்.எல்.ஏக்கள், ஒரு பாஜக எம்.எல்.ஏ வசம் இருக்கிறது. இரண்டு மக்களவை தொகுதிகளை பொறுத்தவரை திமுக, மார்க்சிஸ்ட் கம்யூனிஸ்ட் ஆகிய கட்சிகள் வசம் உள்ளன.எனவே அதிமுகவின் கோட்டையாக இருக்கும் கோவை மண்டலத்தை வளைக்க முன்னாள் அமைச்சர் வேலுமணிக்கு போட்டியாக திமுக அமைச்சர் செந்தில் பாலாஜியை முதல்வர் மு.க.ஸ்டாலின் களமிறக்கி விட்டுள்ளார். ஏற்கனவே ‘கோவை மக்கள் சபை’ என்ற பெயரில் மக்களிடம் மனுக்கள் வாங்கி, அதற்கு விரைந்து தீர்வு காண அதிகாரிகளுக்கு உத்தரவிட்டுள்ளார் செந்தில் பாலாஜி.

மறுபுறம் திமுக நிறைவேற்றாத தேர்தல் வாக்குறுதிகள், பொங்கல் பரிசு சர்ச்சைகள் ஆகியவற்றை மக்களிடம் கொண்டு சென்று அதிமுக தங்களுக்கான ஆதரவை திரட்டி வருகிறது. இந்த சூழலில் நகர்ப்புற உள்ளாட்சி தேர்தல் பிரிவு அதிகாரிகள் முக்கிய அறிவிப்பை வெளியிட்டுள்ளனர். அதாவது, கோவை மாவட்டத்தில் ஒரு மாநகராட்சி, 7 நகராட்சிகள், 33 பேரூராட்சிகள் இருக்கின்றன.

மொத்தம் 21.55 லட்சம் வாக்காளர்கள் இருக்கின்றனர். கோவை மாநகராட்சியில் மொத்தமுள்ள 100 வார்டுகளில் 1,216 வாக்குச்சாவடிகள் அமைக்கப்பட உள்ளன. மேட்டுப்பாளையம், பொள்ளாச்சி, கருமத்தம்பட்டி, காரமடை, மதுக்கரை, கூடலூர், வால்பாறை ஆகிய 7 நகராட்சிகளில் 205 வாக்குச்சாவடிகள் அமைக்கப்படவுள்ளன.33 பேரூராட்சிகளில் 590 வாக்குச்சாவடிகள் அமைக்க முடிவு செய்யப்பட்டுள்ளன.

கோவை மாநகராட்சி மேயர் பதவியானது பெண்கள் (பொது) பிரிவுக்கு ஒதுக்கப்பட்டுள்ளது. மேலும் 7 நகராட்சிகளில் மேட்டுப்பாளையம், வால்பாறை, பொள்ளாச்சி, மதுக்கரை, காரமடை ஆகிய 5 நகராட்சிகளின் தலைவர் பதவிகளும் பெண்கள் (பொது) பிரிவிற்கு ஒதுக்கப்பட்டுள்ளது. ஆனைமலை, தொண்டாமுத்தூர், ஆலாந்துறை, ஒடையகுளம், ஒத்தகால் மண்டபம், சிறுமுகை, சூலூர், திருமலையாம்பாளையம்,

போளூவாம்பட்டி, தென்கரை, சூளேஸ்வரன்பட்டி, பெரியநெகமம், வீரபாண்டி, எட்டிமடை, கண்ணம்பாளையம், நரசிம்மநாயக்கன்பாளையம் ஆகிய 16 பேருராட்சிகளின் தலைவர் பதவிகள் பெண்கள் (பொது) பிரிவிற்கு ஒதுக்கப்பட்டுள்ளன. மேலும் வேடப்பட்டி பேரூராட்சி தலைவர் பதவி பெண்கள் (தனி) பிரிவிற்கு ஒதுக்கப்பட்டுள்ளது.