கோவை வேளாண் பல்கலைக்கழகத்தில் காவி திருவள்ளுவர்: பாஜக பின்னணி?

கோவை மாவட்டத்தில் தமிழ்நாடு வேளாண்மைப் பல்கலைக்கழகத்தில் திருவள்ளுவர் காவி உடையில் இருப்பது போன்ற புகைப்படம் வெளியாகி சர்ச்சையை ஏற்படுத்தியுள்ளது.

கோவை-மருதமலை சாலையில் தமிழ்நாடு வேளாண் பல்கலைக்கழகம் செயல்பட்டு வருகிறது. இங்குத் தமிழ்நாடு மட்டுமல்லாது பிற மாநிலங்களைச் சேர்ந்த மாணவர்களும் பயின்று வருகின்றனர்.

கடந்த சில மாதங்களுக்கு முன்பு பல்கலைக்கழக லோகோவில் காவி நிறம் இருப்பதாகக் குற்றச்சாட்டு எழுந்தது. இதற்குப் பல்கலைக்கழக நிர்வாகம் மறுப்பு தெரிவித்ததுடன் கடந்த பல ஆண்டுகளாகவே லோகோ அதே நிறத்தில் இருப்பதாகத் தெரிவித்தது.

இந்த சூழலில் பல்கலைக்கழகத்தில் உள்ள நூலகத்தில் காவி உடையுடன் கூடிய திருவள்ளுவர் புகைப்படம் பொருத்தப்பட்டுள்ளது. கறுத்த தலைமுடி மற்றும் தாடியுடன், காவி உடையுடன் திருவள்ளுவர் அமர்ந்து இருப்பது போன்ற படமாக அது தயாரிக்கப்பட்டிருந்தது.

யானைகளுக்கும் கொரோனா பரவியதா? -என்ன சொல்கிறது பரிசோதனை ரிப்போர்ட்!
இது மீண்டும் சர்ச்சையை ஏற்படுத்தியுள்ளது. இது குறித்து பல்கலைக்கழக நிர்வாகத்திடம் கேட்டதற்கு, “கடந்த 2015ஆம் ஆண்டு முதல் திருவள்ளுவர் படம் இதே போலத் தான் உள்ளது. இதில் எந்த மத சாயமும் இல்லை” என்றனர்.

இந்த சூழலில் சர்ச்சை பெரியளவில் எழுந்து மாநில அளவில் எதிர்ப்பு கிளம்பவே பல்கலைக்கழக நிர்வாகம் குறிப்பிட்ட திருவள்ளுவர் படத்தை அகற்றிவிட்டு வெள்ள உடை அணிந்த திருவள்ளுவர் படத்தைப் பொருத்தியுள்ளது.