நீ முஸ்லிமா..? முதியவரை இரக்கமே இன்றி தாக்கிய முன்னாள் பாஜக பிரமுகரின் கணவர்

மத்தியப் பிரதேசத்தில் மனநலம் பாதிக்கப்பட்ட 65 வயது முதியவரை இந்து நபர் ஒருவர் நீ முஸ்லிம் தானே..? உன் பெயர் என்ன முகமதுவா..? உன் ஆதார் கார்டை காட்டு.. எனக்கூறி கடுமையாக அடித்து தாக்கும் வீடியோ இணையத்தில் வைரலாகி வருகிறது. அதே சமயம், வீடியோவில் தாக்கப்படும் அந்த முதியவர் மர்மமான முறையில் சடலமாக கண்டெடுக்கப்பட்டுள்ள நிலையில் போலீசார் கொலை வழக்கு பதிவு செய்துள்ளனர்.

இது குறித்து மத்திய பிரதேச போலீசார் கூறுகையில், கொலை செய்யப்பட்ட முதியவர் பெயர் பன்வர்லால் ஜெயின். இவர் ராஜஸ்தான் மாநிலம் ரத்லம் மாவட்டத்தைச் சேர்ந்தவர். பன்வர்லால் ஜெயின் கடந்த மே 15 அன்று ராஜஸ்தானில் ஒரு மத நிகழ்ச்சிக்கு கலந்துகொள்ள வந்து காணாமல் போயுள்ளார். இதுகுறித்து அவரது உறவினர்கள் கொடுத்த புகாரின் பேரில் பல இடங்களில் போஸ்டர்களை ஒட்டி அவரை தேடி வந்தோம்.

இதனிடையே, அந்த முதியவரை ஒருவர் மிரட்டி தாக்கும் வீடியோ வெளியாகியது. அந்த, வீடியோவில் தாக்கியவர் தினேஷ் குஷ்வாஹா என அடையாளம் காணப்பட்டுள்ளது.

தினேஷ் குஷ்வாஹா பாஜக முன்னாள் பிரமுகரின் கணவர் ஆவார். அவர் அந்த முதியவரிடம், உன் பெயர் என்ன? முகமதுவா? என்று கேட்டு முகத்திலும், தலையிலும் தொடர்ச்சியாக அடித்து தாக்கியுள்ளார். பயந்துபோன அந்த முதியவர் கையில் இருக்கும் பணத்தை கொடுத்தபோதும் அவரை தினேஷ் குஷ்வாஹா அடிக்கிறார். இந்நிலையில், முதியவர்பன்வர்லால் ஜெயின் உடல் நீமுச் மாவட்டத்தில் சாலையோரம் கண்டெடுக்கப்பட்டது.

அதை அவரது குடும்பத்தினரிடம் ஒப்படைக்கப்பட்டு இறுதி சடங்கு நடத்தினர். ஜெயின் குடும்ப உறுப்பினர்கள் குஷ்வாஹா மீது புகார் கொடுத்து அவரை உடனடியாக கைது செய்யுமாறு கோரினர். தற்போது கொலை மற்றும் அலட்சியத்தால் மரணம் ஆகிய பிரிவுகளின் கீழ் வழக்குப் பதிவு செய்யப்பட்டுள்ளது. முழுமையான விசாரணைக்கு பிறகு முதியவரின் மரணம் குறித்து தெரிய வரும் என்றும் அவரது கொலைக்கு குஷ்வாஹா தான் காரணம் என்று உறுதி செய்யப்பட்டால் உரிய நடவடிக்கை எடுக்கப்படும் என காவல்துறை கூறியுள்ளது.