ஆப்நகரம்

'கட்டிப் புடிச்சேன் அவ்வளோதான்'.. பாஜக எம்பி பரபரப்பு வாக்குமூலம்..!

மல்யுத்த வீராங்கனை பாலியல் வழக்கில் சிக்கியுள்ள பாஜக எம்பி பரபரப்பு வாக்குமூலம் கொடுத்துள்ளார்.

Authored byதிவாகர் மேத்யூ | Samayam Tamil 4 May 2023, 4:00 pm
இந்திய மல்யுத்த கூட்டமைப்பின் தலைவர் பிரிஜ் பூஷன் சரண் சிங் மீது மல்யுத்த வீராங்கனைகள் பாலியல் புகார் கொடுத்த சம்பவம் சர்வதேச அளவில் அதிர்வலைகளை ஏற்படுத்தி வருகிறது. இந்த விவகாரத்தை குறித்து விசாரிக்க உச்ச நீதிமன்றம் உத்தரவிட்ட பிறகே டெல்லி காவல்துறை பிரிஜ் பூஷன் மீது முதல் தகவல் அறிக்கையை பதிவு செய்தது.
Samayam Tamil wrestlers sexual case


இதனால் போலீசார் மீது வீராங்கனைகளுக்கு நம்பிக்கை ஏற்படவில்லை. மேலும், பிரிஜ் பூஷன் பாஜக எம்பி என்பதால் அவரை கைது செய்து அவரை பதவியில் இருந்து தூக்கும் வரை விடமாட்டோம் என்று மல்யுத்த வீரர், வீராங்கனைகள் டெல்லி ஜந்தர் மந்தரில் போராட்டம் நடத்தி வருகின்றனர்.

பிரிஜ் பூஷன் மீது டெல்லி காவல்துறை இரண்டு வழக்குகளை பதிவு செய்துள்ளது. அதில் ஒன்று சிறார்களுக்கு எதிரான பாலியல் தொல்லை வழக்கான போக்சோ வழக்கும் பதிவு செய்யப்பட்டுள்ளது. இந்த நிலையில், மல்யுத்த வீராங்கனைகளால் குற்றம்சாட்டப்பட்டுள்ள பிரிஜ் பூஷன் ஒரு தந்தை போலத்தான் மல்யுத்த வீராங்கனையை கட்டி அணைத்தேன் என்று வாக்குமூலம் கொடுத்துள்ளார்.

வாக்குமூலம்

அந்த பெண்தான் 18 வயதுக்குட்பட்ட மல்யுத்த வீராங்கனை என சந்தேகிக்கப்படுகிறது. பிரிஜ் பூஷனின் வாக்குமூலத்தில் '' அந்த பெண் தனது தந்தையிடம் பேச விரும்பினார். அப்போது அந்த பெண்ணிடம் போன் இல்லை எனவே நான் செல்போன் கொடுத்து அவரது தந்தையிடம் பேச வைத்தேன். அதன் பிறகு அந்த பெண்ணை கட்டி அணைத்தேன். அதில் அந்த பெண்ணுக்கு விருப்பம் இல்லாததை போல தெரிந்தது. அப்பத்து நான் உன் தந்தை போலத்தான், உன்னை கட்டி அணைக்கிறேன் என்று கூறினேன். இது தூக்கில் போடுகிற அளவுக்கு குற்றமா என சொல்லுங்கள் என்று பிரிஜ் பூஷன் செய்தி நிறுவனத்துக்கு தந்த பேட்டியில் கூறியுள்ளார்.

போலீஸ் அராஜகம்

மல்யுத்த வீராங்கனையை அவரது சம்மதம் இன்றி கட்டிபிடித்துவிட்டு அதை நியாயப்படுத்தி பேசும் பாஜக எம்பியின் செயல் போராட்டத்தில் ஈடுபட்டு வரும் வீரர்களுக்கும், பெண்கள் அமைப்பிற்கும் அதிர்ச்சியை ஏற்படுத்தியுள்ளது. முன்னதாக,டெல்லியில் நடைபெற்று வரும் மல்யுத்த வீராங்கனைகளின் போராட்டத்திற்கு நேரில் ஆதரவு தெரிவித்த
டெல்லி மகளிர் ஆணைய தலைவர் சுவாதி மாலிவாலை போலீசார் நள்ளிரவில் பலவந்தமாக கைது செய்து அழைத்து சென்றனர். டெல்லியில் போராடி வரும் மல்யுத்த வீராங்கனைகளுக்கு ஆதரவு தந்தால் அவர்களை கைது செய்யும் காவல்துறையின் போக்கும், பாஜக எம்பியின் பேச்சும் ஆட்சி அதிகார கொடுங்கோல் தனத்தை காட்டுகிறது.

பிரிஜ் பூஷன் சிறைக்கு போகணும்

இதற்கிடையே செய்தியாளர்களுக்கு பேட்டி தந்த மல்யுத்த வீராங்கனைகள் "உச்ச நீதிமன்றத்தின் உத்தரவை நாங்கள் மதிக்கிறோம், ஆனால் டெல்லி காவல்துறை மீது எங்களுக்கு நம்பிக்கை இல்லை. எங்களது இந்த போராட்டம் வெறும் எஃப்.ஐ.ஆர். பதிவு செய்வதற்காக அல்ல. பிரிஜ் பூஷன் போன்றவர்களை தண்டிப்பதற்காக நடக்கும் போராட்டம். அவரை சிறையில் அடைக்க வேண்டும். அவருக்கு கொடுக்கப்பட்டுள்ள பொறுப்புகளை பறிக்க வேண்டும் என அவர்கள் கூறினர்.
எழுத்தாளர் பற்றி
திவாகர் மேத்யூ
திவாகர். நான் தொலைக்காட்சி, நியூஸ் ஆப், செய்தி இணைதளம் என ஊடக துறையில் 5 ஆண்டுகளுக்கும் மேலாக பயணித்து வருகிறேன். எழுத்தின் மீதான ஆர்வமும் ஊடகத்தின் மீது இருக்கும் பற்றால் இத்துறையை தேர்வு செய்துள்ளேன். அரசியல், குற்றம், அரசியல் - குற்றம் சார்ந்த அலசல், அரசு சார்ந்த செய்திகளை எவ்வித சமரசமும் இல்லாமல் எழுதி வருகிறேன். கடந்த 3 ஆண்டுகளாக TIMES Of INDIA சமயம் தமிழில் Senoir Digital Content Producer ஆக பணியாற்றுகிறேன்.... மேலும் படிக்க

அடுத்த செய்தி