ராணுவ அதிகாரியை போல் நடித்து இளைஞரிடம் கைவரிசை: வாட்ஸ் அப் ஆசாமியை தேடும் போலீஸ்!!

புதுக்கோட்டை அருகே உள்ள திருமலைசமுத்திரபுரம் கிராமத்தைச் சேர்ந்த கணேஷ் குமார் என்ற இளைஞரிடம் வாட்ஸ்அப் மூலம் ஒரு நபர் நட்பை ஏற்படுத்திக் கொண்டுள்ளார்.

தானொரு ராணுவ அதிகாரி என்றும், தன்னிடம் ஒரு புல்லட் விற்பனைக்கு உள்ளதாகவும் அதை ஓஎல்எக்ஸ் மூலம் விற்பனை செய்ய விரும்புவதாகவும் கூறியுள்ளார். இதனை நம்பிய இளைஞர் கணேஷ்குமார் அந்த புல்லட்டை வாங்குவதற்காக கூகுள் பே மூலம் ரூ 80 ஆயிரத்து 200 ரூபாயை பண பரிமாற்றம் செய்து உள்ளார்.

அதன் பின்பு சம்பந்தப்பட்ட நபரை தொடர்பு கொள்ள முடியாததால் அதிர்ச்சி அடைந்த கணேஷ்குமார், இதுகுறித்து கணேஷ் நகர் காவல் நிலையத்தில் புகார் அளித்தார். இதுகுறித்து விசாரணை மேற்கொண்ட கணேஷ் நகர் போலீசார் சம்பந்தப்பட்ட நபரின் தொலைபேசி எண்ணை வைத்து சைபர்கிரைம் போலீசாரின் உதவியோடு அவரது முகவரியை கண்டறிந்தனர்.

கோவை: தாலி கட்டிக்க மறுத்த பெண் கொலை..! கறிக்கடை காரரின் வெறிச்செயல்...

அதில், அந்த நபர் ராஜஸ்தான் மாநிலத்தைச் சேர்ந்த ராகுல் முத்து என்பது தெரிய வந்தது. சம்பந்தப்பட்ட நபர் ராணுவ அதிகாரி போல் நடித்து இதுபோல் பல இளைஞர்களிடம் ஓஎல்எக்ஸ் மூலம் கார் மற்றும் பைக்குகளை விற்பனை செய்வதாக கூறி பல லட்சம் ரூபாய் மோசடி செய்துள்ளதும் தெரிய வந்தது.

இதனையடுத்து அந்த நபர் மீது வழக்குப்பதிவு செய்துள்ள போலீசார், அவரை கைது செய்வதற்கான நடவடிக்கைகளில் தீவிரமாக ஈடுபட்டு வருகின்றனர்.

இந்நிலையில், இதே நபர் கடந்த 6 மாதங்களுக்கு முன்பு ராணுவ அதிகாரி போல் நடித்து புதுக்கோட்டை பெரியார் நகரைச் சேர்ந்த ஒரு நபரிடம் கார் விற்பனை செய்வதாக ரூ 7.5 லட்சம் மோசடி செய்துள்ளார். அது சம்பந்தமான வழக்கும் புதுக்கோட்டை நகர காவல் நிலையத்தில் இன்னும் நிலுவையில் இருப்பது குறிப்பிடத்தக்கது.

இதனையடுத்து, சம்பந்தப்பட்ட நபரின் புகைப்படம் மற்றும் முகவரியை ஆதாரமாகக் கொண்டு, அவரை கைது முயற்சியில் போலீசார் தீவிரமாக ஈடுபட்டு வருகின்றனர்.