விருதுநகர் பாலியல் வழக்கு: 6 மணி நேர விசாரணை - வேறு சிறைக்கு மாற்றம்!

விருதுநகரில் 22 வயதான இளம்பெண்ணை பாலியல் வன்கொடுமை செய்து வீடியோ எடுத்து மிரட்டிய விவகாரம் தமிழகம் முழுவதும் அதிர்வலைகளை ஏற்படுத்தியுள்ளது. இது தொடர்பாக அளிக்கப்பட்ட புகாரைத் தொடர்ந்து ஹரிஹரன், ஜூனத் அகமது, மாடசாமி, பிரவீன் மற்றும் பள்ளி மாணவர்கள் 4 பேர் என மொத்தம் 8 பேர் கைது செய்யப்பட்டனர்.

இந்த வழக்கில் குற்றவாளிகளுக்கு அதிகபட்ச தண்டனை வழங்க முதல்வர் உத்தரவிட்டுள்ளதாக டிஜிபி சைலேந்திரபாபு தெரிவித்திருந்தார். முதல்வர் ஸ்டாலினின் உத்தரவையடுத்து, இந்த வழக்கு விசாரணை சிபிசிஐடி அதிகாரிகள் வசம் ஒப்படைக்கப்பட்டுள்ளது. கைது செய்யப்பட்ட 8 பேர் மீதும் சிபிசிஐடி போலீஸார் பாலியல் வன்கொடுமை, வன்கொடுமை தடுப்புச் சட்டம் உட்பட 6 பிரிவுகளின் கீழ் புதிதாக வழக்குப் பதிவு செய்துள்ளனர்.

விருதுநகர் சிபிசிஐடி அலுவலகத்தில் டிஎஸ்பி சரவணன், சிறப்புப் புலனாய்வுப் பிரிவு அதிகாரியான டிஎஸ்பி வினோதினி ஆகியோரிடம் சிபிசிஐடி எஸ்.பி. முத்தரசி நேற்று காலை ஆலோசனை நடத்தினார்.

அதைத் தொடர்ந்து பாலியல் வன்கொடுமையால் பாதிக்கப்பட்ட பெண்ணிடம் சிபிசிஐடி எஸ்.பி. முத்தரசி, டிஎஸ்பி வினோதினி ஆகியோர் சுமார் 6 மணி நேரத்துக்கும் மேலாக விசாரணை செய்தனர்.

மது போதையில் அலங்கோலம்... நேற்று பள்ளி மாணவிகள், இன்று பெண் பயணி..!
மேலும் இந்த வழக்கில் கைது செய்யப்பட்டு சிறையில் உள்ள ஹரிஹரன் உட்பட 4 பேரையும், ராமநாதபுரம் கூர்நோக்கு இல்லத்தில் அடைக்கப்பட்டுள்ள சிறுவர்கள் 4 பேரையும் போலீஸ் காவலில் எடுத்து விசாரிக்க சிபிசிஐடி போலீஸார் திட்டமிட்டுள்ளனர். இந்த நிலையில், விருதுநகர் பாலியல் வழக்கில் கைதான 4 பேரும் மதுரை சிறைக்கு மாற்றப்பட்டுள்ளனர். ஸ்ரீவில்லிபுத்தூர் கிளைச் சிறையில் இருந்து மதுரை மத்திய சிறைக்கு அவர்கள் நால்வரும் மாற்றப்பட்டுள்ளனர்.

முன்னதாக, இவ்வழக்கில் கைது செய்யப்பட்டு சிறையில் அடைக்கப்பட்டுள்ள மாடசாமியை ஜாமீனில் விடுவிக்கக் கோரி ஸ்ரீவில்லிபுத்தூரில் உள்ள வன்கொடுமை தடுப்பு நீதிமன்றத்தில் நேற்று மனு தாக்கல் செய்யப்பட்டது. இதன் மீதான விசாரணை வருகிற 28ஆம் தேதி நடைபெறவுள்ளது என்பது குறிப்பிடத்தக்கது.