FACT CHECK: மியா கலிஃபா போட்டோவுக்கு கேக் ஊட்டிய காங்கிரஸார்!

வேளாண் சட்டங்களுக்கு எதிராக டெல்லியில் போராட்டத்தில் ஈடுபட்டு வரும் விவசாயிகளுக்கு ஆதரவாக பிரபல சர்வதேச பாடகி ரிஹானா, இளம் சுற்றுச்சூழல் ஆர்வலர் கிரெட்டா துன்பெர்க், அமெரிக்க துணை அதிபர் கமலா ஹாரிஸின் உறவினர் மீனா ஹாரிஸ் உள்ளிட்ட பலரும் கருத்து பதிவிட்டனர்.

அந்த வரிசையில் பிரபல மாடலும், நடிகையுமானா மியா கலிஃபாவும் விவசாயிகளுக்கு ஆதரவான கருத்தை பதிவிட்டிருந்தார். நான் விவசாயிகள் பக்கம் நிற்கிறேன் என்று மியா கலிஃபா ட்வீட் பதிவிட்டதும் வழக்கம் போல அவருக்கு பலரும் தங்களது எதிர்ப்பை பதிவு செய்தனர்.

பரவும் செய்தி

இந்த நிலையில், மியா கலிஃபா புகைப்படத்துக்கு காங்கிரஸ் கட்சியை சேர்ந்தவர்கள் கேக் ஊட்டுவது போன்ற புகைப்படம் ஒன்று ஒன்று வாட்ஸ் அப், ஃபேஸ்புக் உள்ளிட்ட சமூக வலைதளங்களில் தகவல் ஒன்று பரப்பப்பட்டு வருகிறது. அதில், மியா கலிஃபா புகைப்படத்திற்கு முன்பு உள்ள கேக்கில் ஐ லவ் யூ மியா கலிஃபா என்று எழுதப்பட்டுள்ளது. அந்த கேக்கை ஒருவர் மியாவின் புகைப்படத்துக்கு ஊட்டுவது போன்று உள்ளது.


இந்த தகவலை பாஜக நிர்வாகி சுரேந்திர பூனியா உள்பட பலரும் தங்களது பக்கத்தில் பகிர்ந்து காங்கிரஸ் கட்சியை கடுமையாக விமர்சித்து வருகின்றனர். சுரேந்திர பூனியா தற்போது அந்த பதிவை நீக்கிவிட்டார் என்பது கவனிக்கத்தக்கது.

உண்மை என்ன

சமூக வலைதளங்களில் பகிரப்படும் அந்த புகைப்படத்தின் உண்மைத்தன்மை குறித்து டைம்ஸ் ஆஃப் இந்தியாவின் உண்மை கண்டறியும் குழு ஆய்வு மேற்கொண்டது. அதில், அந்த தகவல் போலியானது என்று தெரிய வந்துள்ளது. மேலும், அது எடிட் செய்யப்பட்ட புகைப்படம் என்றும் தெரிய வந்துள்ளது.

சரிபார்ப்பு வழிமுறை

சமூக வலைதளங்களில் பகிரப்பட்டு வரும் அந்த புகைப்படத்தை ரிவர்ஸ் இமேஜ் தேடல் செய்தால் அது தொடர்பான பல்வேறு செய்திகள் கிடைக்கின்றன. அதன்படி, புகைப்படத் தளமான கெட்டி இமேஜஸ்ஸில் இடம்பெற்றுள்ள தகவலின் அடிப்படையில், “கடந்த 2007ஆம் ஆண்டு ஜூன் மாதம் 19ஆம் தேதியன்று காங்கிரஸ் முன்னாள் தலைவர் ராகுல் காந்தியின் 37ஆவது பிறந்தநாளையொட்டி அக்கட்சியின் இளைஞரணியினர் டெல்லியில் உள்ள சோனீயாவின் இல்லத்தின் முன்பு கொண்டாட்டத்தில் ஈடுபட்டபோது எடுக்கப்பட்டுள்ளது” அந்த செய்தியை படிக்க இங்கு க்ளிக் செய்யவும்.

அதில், காங்கிரஸ் தலைவர் ராகுல் காந்தியின் புகைப்படத்துக்கு தொண்டர் ஒருவர் கேக் ஊட்டுகிறார். அதிலிருக்கும் ராகுலின் புகைப்படத்தை எடிட் செய்து மியா கலிஃபாவின் புகைப்படத்தை வைத்து மியாவுக்கு காங்கிரஸ் கட்சியின் கேக் ஊட்டியதாக தவறான தகவலை பரப்பி வருகிறார்கள்.

FACT CHECK: ஆண்குறி வழியாக கொரோனா தடுப்பூசி போட சொல்லும் மருத்துவர்கள்!

முடிவு

எனவே, மியா கலிஃபா புகைப்படத்துக்கு காங்கிரஸ் கட்சியை சேர்ந்தவர்கள் கேக் ஊட்டியதாக சமூக வலைதளங்களில் பகிரப்பட்டு வரும் தகவல் போலியானது முற்றிலும் உண்மைக்கு புறம்பானது.