FACT CHECK: டாக்டே புயலால் சேதமடைந்த மும்பையின் பிரபல ஸ்டார் ஹோட்டல்!

லட்சத்தீவு மற்றும் தென் கிழக்கு அரபிக்கடலில் நிலைகொண்டிருந்த காற்றழுத்தத் தாழ்வு மண்டலம் அதிதீவிர புயலாக வலுப்பெற்று குஜராத் மாநிலம் மகுவா - போர்பந்தர் இடையே கரையை கடக்கத் தொடங்கியுள்ளது. இந்த செயல்முறை சுமார் 2 மணி நேரத்துக்கு நீடிக்கும் என்று இந்திய வானிலை ஆய்வு மையம் தெரிவித்துள்ளது.

முன்னதாக, இப்புயலால் கேரளா, மகாராஷ்டிரா, கோவா, குஜராத் ஆகிய மாநிலங்களில் சூறாவளிக் காற்றுடன் கனமழை பெய்தது. இதனால், மகாராஷ்டிரத் தலைநகர் மும்பை உள்ளிட்ட சில பகுதிகளில் மரங்கள் வேரோடு சாய்ந்தன. மின்கம்பங்கள் அறுந்து விழுந்தன. மும்பை விமான நிலையம் 3 மணி நேரத்துக்கு தனது சேவைகளை நிறுத்தி வைத்துள்ளது. இதனிடையே, வழக்கம் போல் புயல் தொடர்பான வதந்திகளும் தற்போது பரவத் தொடங்கியுள்ளன.

பரவும் செய்தி

அந்த வகையில், டாக்டே புயலால் மும்பையில் சூறாவளிக் காற்றுடன் பெய்த கனமழை காரணமாக நரிமன் பாயிண்ட் பகுதியில் உள்ள பிரபல நட்சத்திர ஹோட்டல் ட்ரிடெண்ட் கடுமையான சேதமடைந்துள்ளதாக வீடியோ ஒன்று வாட்ஸ் அப், ஃபேஸ்புக், ட்விட்டர் உள்ளிட்ட சமூக வலைதளங்களில் பரப்பப்பட்டு வருகிறது. அந்த வீடியோவில், கடுமையான காற்று வீசுவது போன்றும், அப்போது, பார்க்கிங் பகுதியில் நிற்கும் கார்கள் மீது கான்க்ரீட் ஸ்லாப் ஒன்று உடைந்து விழுவது போன்றும் உள்ளது. இந்த வீடியோவை உண்மை என்று நம்பி பலரும் பகிர்ந்து வருகின்றனர்.



உண்மை என்ன

சமூக வலைதளங்களில் பகிரப்படும் அந்த வீடியோவில் இடம் பெற்றுள்ள தகவலின் உண்மைத்தன்மை குறித்து சமயம் தமிழின் உண்மை கண்டறியும் குழு ஆய்வு மேற்கொண்டது. அதில் அந்த தகவல் போலியானது என்றும், வீடியோவுக்கும் அந்த தகவலுக்கு எந்த சம்பந்தமும் இல்லை என்பதும் தெரிய வந்துள்ளது.

சரிபார்ப்பு வழிமுறை

சமூக வலைதளங்களில் பகிரப்படும் அந்த வீடியோவை சற்று உற்று நோக்கினால் அந்த வீடியோ சிசிடிவி கேமிராவில் பதிவானது என்றும், அது கடந்த 2020ஆம் ஆண்டு ஆகஸ்ட் மாதம் எடுக்கப்பட்டது என்றும் தெரிந்து கொள்ள முடியும். வீடியோவின் வலது ஓரத்தில் அது எடுக்கப்பட்ட ஆண்டும், மாதமும் தெளிவாக உள்ளது.

FACT CHECK: ஆக்சிஜன் கிடைக்காததால் கட்சி அலுவலகத்தையே சூறையாடிய பாஜகவினர்!

அதுதவிர, அந்த வீடியோவை புகைப்படங்களாக உடைத்து ரிவர்ஸ் இமேஜ் தேடல் செய்தால் அது தொடர்பான பல்வேறு செய்திகள் நமக்கு கிடைக்கின்றன. அதன்படி, சவுதி அரேபியா நாட்டின் மதீனா நகரில் பெய்த கனமழையின் போது, பார்க்கிங் பகுதியில் நின்று கொண்டிருந்த கார்கள் மீது அக்கட்டடத்தின் கான்க்ரீட் ஸ்லாப் உடைந்து விழுந்துள்ளது என்று Al Jazeera செய்தி நிறுவனம் செய்தி வெளியிட்டுள்ளது. அந்த செய்தியை படிக்க இங்கு க்ளிக் செய்யவும்.

முடிவு

எனவே, டாக்டே புயலால் மும்பயின் பிரபல ஸ்டார் ஹோட்டல் ட்ரிடெண்ட் சேதமடைந்ததாக சமூக வலைதளங்களில் பகிரப்பட்டு வரும் தகவல் போலியானது முற்றிலும் உண்மைக்கு புறம்பானது. அந்த வீடியோ 2020ஆம் ஆண்டு சவுதி அரேபியா நாட்டில் எடுக்கப்பட்டது.