FACT CHECK: லுங்கி அணிந்து போஸ் கொடுத்த இளம் பெண்கள் - காரணம் என்ன?

கல்லூரி வளாகத்தில் மாணவிகள் ஜீன்ஸ் பேண்ட் அணிய கேரள அரசு மருத்துவக்கல்லூரி தடை விதித்துள்ளது என்று கடந்த 2016ஆம் ஆண்டில் செய்தி வெளியானது. அதேபோல், கேரள மாநிலம் கோழிக்கோடு பகுதியில் உள்ள பெண்கள் கல்லூரியும் ஜீன்ஸ், குட்டை மேலாடை அணிவதற்கு தடை விதித்தது. இதற்கு பல்வேறு தரப்பினர் தங்களது எதிர்ப்பை பதிவு செய்தனர். இதேபோன்று பல்வேறு சம்பவங்கள் அம்மாநிலத்தில் நடைபெற்றுள்ளன.

பரவும் செய்தி

இந்த நிலையில், கேரளாவில் உள்ள கல்லூரி ஒன்று பெண்கள் ஜீன்ஸ் பேண்ட் அணிய தடை விதித்ததால் அதற்கு எதிர்ப்பு தெரிவிக்கும் பொருட்டு லுங்கி அணிந்து வந்த மாணவிகள் என்று கூறும் புகைப்படம் ஒன்று வாட்ஸ் அப், ஃபேஸ்புக் உள்ளிட்ட சமூக வலைதளங்களில் பரப்பப்பட்டு வருகிறது.

இதனை தங்களது ட்விட்டர் பக்கத்தில் பகிரும் பலரும், மாணவிகளின் செயலால் கல்லூரி நிர்வாகம் செய்வதறியாது திகைத்துள்ளது. இந்த பெண்கள் ஜீனியஸ் (அறிவாளி) என்று பதிவிட்டு வருகின்றனர்.



உண்மை என்ன

சமூக வலைதளங்களில் பகிரப்படும் இந்த புகைப்படத்தின் உண்மைத்தன்மை குறித்து டைம்ஸ் ஆஃப் இந்தியாவின் உண்மை கண்டறியும் குழு ஆய்வு மேற்கொண்டது. அதில் அந்த புகைப்படம் போலியானது என தெரிய வந்துள்ளது. மேலும், அந்த புகைப்படம் ஐந்து ஆண்டுகளுக்கு முன்னர் அமெரிக்காவில் எடுக்கப்பட்டது. அதில் இருக்கும் இந்திய வம்சாவளியை அமெரிக்க பெண்கள் தெலுங்கு நடிகர் மகேஷ் பாபுவின் ரசிகைகள் என்றும் தெரிய வந்துள்ளது.

FAKE ALERT: மெட்ரோ ரயில் லிப்ட்டுக்குள் பெண்ணுக்கு நேர்ந்த கதி?


சரிபார்ப்பு மற்றும் வழிமுறை

அந்த புகைப்படத்தை கூகுள் ரிவர்ஸ் இமேஜ் தேடல் செய்தால் 2015ஆம் ஆண்டு ஆகஸ்ட் மாதம் 11ஆம் தேதியன்று வெளியிடப்பட்ட செய்தி ஒன்று நமக்கு கிடைக்கிறது. “SUPERSTAR'S LUNGI EFFECT ON GIRLS” என்ற தலைப்பில் வெளியிடப்பட்டுள்ள அந்த செய்தியில், தெலுங்கு நடிகர் மகேஷ் பாபுவின் ரசிகைகளான இந்திய வம்சாவளியை அமெரிக்க பெண்கள் அவர் மீது கொண்ட பாசம் காரணமாக அவரைப் போன்று லுங்கி அணிந்து போஸ் கொடுத்துள்ளனர் என தெரிவிக்கப்பட்டுள்ளது. அதே புகைப்படத்துடன் இதேபோன்று வேறு பல செய்திகளும் நமக்கு கிடைக்கிறது.

முடிவு

எனவே, கேரளாவை சேர்ந்த கல்லூரிக்கு எதிர்ப்பு தெரிவிக்கும் வகையில் இளம் பெண்கள் லுங்கி அணிந்து வந்ததாக சமூக வலைதளங்களில் பகிரப்பட்டுவரும் தகவல் போலியானது முற்றிலும் உண்மைக்கு புறம்பானது.