FACT CHECK: மடிசார் மாமி கமலா ஹாரிஸ்... டிங்கு டாங்கு டிங்..?

அமெரிக்காவின் 46ஆவது அதிபராக ஜோ பைடன் தேர்வாகியுள்ளார். துணை அதிபராக கமலா ஹாரிஸ் தேர்வாகியுள்ளார். இதன் மூலம் அமெரிக்கத் துணை அதிபரகும் முதல் கருப்பின மற்றும் முதல் ஆசிய அமெரிக்கப் பெண் என்ற பெருமையை தமிழகத்தைப் பூர்வீகமாக கொண்ட கமலா ஹாரிஸ் பெற்றுள்ளார். கமலா ஹாரிஸ் தமிழகத்தை பூர்வீகமாக கொண்டவர் என்பதால் அவரை பற்றிய செய்திகள் முக்கிய இடத்தை பிடித்துள்ளன.

கமலா ஹாரிஸின் தாய் தமிழகத்தைச் சேர்ந்தவர். அவரது உறவினர்கள் சென்னையில் வசிக்கிறார்கள். இவர்களின் பூர்விகம் தமிழ்நாட்டின் திருவாரூர் மாவட்டத்தில் மன்னார்குடி அருகே உள்ள துளசேந்திரபுரம். கமலா ஹாரிஸ் தாய் வழி உறவுகள் பிராமண சமூகத்தைச் சேர்ந்தவர்கள் என்பதால் அதைக் குறிப்பிட்டு பல்வேறு வகையான மீம்ஸ்களும், தவறான பதிவுகளும் சமூக வலைதளங்களில் பகிரப்பட்டு வருகிறது.

அந்த வகையில், அவர் மாட்டுக்கறி தின்றதாக வெளியான புகைப்படத்தின் உண்மைத் தன்மையை டைம்ஸ் ஆஃப் இந்தியாவின் உண்மைக் கண்டறியும் குழு வெளியிட்டிருந்தது.

FACT CHECK: மாட்டுக்கறி சாப்பிட்டாரா கமலா ஹாரிஸ்?

பரவும் செய்தி

கமலா ஹாரிஸ் பிராமணப் பெண்களை போன்று மடிசார் சேலை கட்டியுள்ளது போன்ற புகைப்படம் ஒன்று வாட்ஸ் அப், ஃபேஸ்புக் உள்ளிட்ட சமூக வலைதளங்களில் பரப்பப்பட்டு வருகிறது. இதனை தங்களது சமூக வலைதளப் பக்கத்தில் பகிரும் பலரும் அவரது சமூகத்தின் பெயரைக் குறிப்பிட்டு பதிவிட்டு வருகின்றனர். வேறு சிலரோ, வீரா திரைப்படத்தில் வரும் பாடல் வரிகளான ‘ஐயர் ஆத்துப் பொண்ணு...மாமி சின்ன மாமி...டிங்கு டாங்கு டிங்’ என்பதை குறிப்பிட்டு அவரை ட்ரோல் செய்து வருகின்றனர்.



கமலா ஹாரிஸ் பெரும்பாலும் மாடர்ன் உடைகளை அணிபவர் என்பதாலும், ஒருமுறை இந்தியா வந்தபோதும் கூட அவரது உறவினர்களுடன் எடுத்துக் கொண்ட புகைப்படத்திலும் சாதாரண சேலையையே அவர் அணிந்திருந்தார் என்பதாலும், இந்த புகைப்படத்தின் உண்மைத்தன்மை கேள்விக்குள்ளாகியுள்ளது.


உண்மை என்ன

சமூக வலைதளங்களில் பகிரப்படும் அந்த புகைப்படத்தின் உண்மைத்தன்மை குறித்து டைம்ஸ் ஆஃப் இந்தியாவின் உண்மை கண்டறியும் குழு ஆய்வு மேற்கொண்டது. அதில், அந்த புகைப்படம் போலியானது என்பதும், போட்டோஷாப் மூலம் எடிட் செய்து கமலா ஹாரிஸின் தலையை மட்டும் சேர்த்துள்ளனர் என்பதும் தெரிய வந்துள்ளது.


சரிபார்ப்பு மற்றும் வழிமுறை

சமூக வலைதளங்களில் பகிரப்பட்டு வரும் அந்த புகைப்படத்தை பார்த்தாலே அது மார்பிங் செய்யப்பட்ட புகைப்படம் என்பது எளிதாக தெரிந்து விடும். தலையை மட்டும் மார்பிங் செய்து கமலா ஹாரிஸின் புகைப்படம் சேர்க்கப்பட்டுள்ளது தெரிய வரும். மேலும், அந்த புகைப்படத்தை ரிவர்ஸ் இமேஜ் தேடல் செய்தால் அது கர்னாடக இசைக் கலைஞர் விஷாகா ஹரி என்பது தெரிய வருகிறது.


விஷாகா ஹரி மடிசார் சேலையில் இருக்கும் புகைப்படத்தில் அவரது தலையை மட்டும் எடுத்து விட்டு கமலா ஹாரிஸின் புகைப்படத்தை எடிட்டிங் செய்து சேர்த்துள்ளனர். இது தொடர்பாக தூர்தர்ஷன் செய்தி ஏற்கனவே உண்மைத்தன்மையை கண்டறிந்து வெளியிட்டுள்ளது. அந்த செய்தியை படிக்க இங்கு க்ளிக் செய்யவும்.

முடிவு

எனவே, கமலா ஹாரிஸ் மடிசார் சேலை அணிந்ததாக சமூக வலைதளங்களில் பகிரப்பட்டுவரும் புகைப்படம் போலியானது முற்றிலும் உண்மைக்கு புறம்பானது.