FAKE ALERT: ஜோதிராதித்ய சிந்தியா கையில் ஆபரேஷன் தாமரை ஆவணம் உண்மையா?

மத்தியப்பிரதேச மாநில காங்கிரஸ் மூத்த தலைவர் ஜோதிராதித்ய சிந்தியா அக்கட்சியில் இருந்து விலகி பாஜகவில் சேர்ந்துள்ளார். அவருக்கு ஆதரவாக அம்மாநில காங்கிரஸ் எம்.எல்.ஏ.க்கள் 22 பேரும் ராஜினாமா செய்துள்ளனர். இதனால், மத்தியப்பிரதேச மாநிலத்தில் அரசியல் நெருக்கடி நிலவி வருகிறது.

இந்நிலையில், காங்கிரஸ் கட்சியை சேர்ந்த நகராட்சி மன்ற உறுப்பினர் யாஸ்மின் கிட்வாய் தனது ட்விட்டர் பக்கத்தில் சிந்தியாவின் புகைப்படத்தை பகிர்ந்து, “காங்கிரஸ் கட்சியை சேர்ந்த ஒருவரால் எவ்வாறு பாஜகவில் இணைய முடிகிறது. தனிப்பட்ட வளர்ச்சியை புரிந்து கொள்ள முடிகிறது, ஆனால் சித்தாந்தம் என்னவாகுவது” என கேள்வி எழுப்பியிருந்தார்.

அந்த புகைப்படத்தில் காவி நிற குர்தா ஆடையை ஜோதிராதித்ய சிந்தியா அணிந்திருப்பதுடன், நெற்றியில் திலகமிட்டு, ஆபரேஷன் தாமரை எனும் ஆவணத்தை கையில் வைத்துள்ளது போன்று உள்ளது. இந்த புகைப்படம் வாட்ஸ் அப், ஃபேஸ்புக் உள்ளிட்ட சமூக வலைதளங்களில் வைரலாக பரப்பப்பட்டு வரும் நிலையில், அதன் உண்மைத்தன்மை குறித்து டைம்ஸ் ஆஃப் இந்தியாவின் உண்மை கண்டறியும் குழு ஆய்வு மேற்கொண்டது.

FAKE ALERT: Congress leader shares doctored image of Scindia with ‘Operation Lotus’ document in hand

அதில், சமூக வலைதளங்களில் பகிரப்படும் ஜோதிராதித்ய சிந்தியாவின் புகைப்படம் போலி என தெரியவந்துள்ளது. உண்மையான புகைப்படத்தில், வெள்ளை நிற குர்தா அணிந்திருக்கும் சிந்தியா தனது நெற்றியில் திலகமிடவில்லை. அத்துடன் அவரது கையில் வெள்ளை நிற ஆவணம் ஒன்று இருக்கிறது. அதில், ஆபரேஷன் தாமரை என எழுதப்படவில்லை.


கூகுளில் தலைகீழ்-படத் தேடலைப் பயன்படுத்தும் முறையை பயன்படுத்தில் டைம்ஸ் ஆஃப் இந்தியாவின் உண்மை கண்டறியும் குழு இதனை கண்டறிந்துள்ளது. அதன்படி, 2014ஆம் ஆண்டில் டெக்கான் ஹெரால்ட் பத்திரிகை செய்தியில் அந்த புகைப்படம் வந்துள்ளது. அந்த புகைப்படம் பிடிஐ செய்தி நிறுவனத்தை சார்ந்ததாகும்.


எனவே, காவி நிற குர்தா ஆடையில் நெற்றியில் திலகமிட்டு கையில் ஆபரேஷன் தாமரை எனும் ஆவணத்தை ஜோதிராதித்ய சிந்தியா வைத்திருப்பதாக பகிரப்படும் புகைப்படம் போலியானது முற்றிலும் தவறானது.