FAKE ALERT: சிவசேனாவை கடுமையாக சாடினாரா அரவிந்த் கெஜ்ரிவால்?

டெல்லி சட்டப்பேரவைத் தேர்தல் முடிவுகள் கடந்த 11ஆம் தேதி வெளியாகின. அதில், ஆம் ஆத்மி கட்சி 62 தொகுதிகளில் வெற்றி பெற்று ஆட்சியமைக்கவுள்ளது. அக்கட்சியின் தலைவர் அரவிந்த் கெஜ்ரிவாலுக்கு அரசியல் கட்சி தலைவர்கள் உள்பட ஏராளமானோர் வாழ்த்து தெரிவித்து வருகின்றனர்.

அந்த வகையில், தனக்கு வாழ்த்து தெரிவித்த சிவசேனா கட்சித் தலைவர் உத்தவ் தாக்கரேவை, கடுமையாக சாடி, தனது அதிகாரப்பூர்வ ட்விட்டர் பக்கத்தில் அரவிந்த் கெஜ்ரிவால் பதிவிட்டதாக புகைப்படம் ஒன்று சமூக வலைதளங்களில் வைரலாகி வருகிறது. அந்த புகைப்படத்தில் உத்தவ் தாக்கரேவை டேக் செய்தது போன்றும் உள்ளது.

அதில், “சிவசேனாவிடம் இருந்து எந்த ஒரு வாழ்த்தும் எங்களுக்கு தேவையில்லை. காங்கிரஸ் கட்சியுடன் வேறு வழியில்லாமல் கூட்டணி வைத்துள்ள சிவசேனா, எப்போது வேண்டுமானலும் பாஜகவுடன் சேர்ந்து கொள்ளும். நாங்கள் தனியாக போராடுகிறோம். அந்த போராட்டத்தை தொடர்வோம்” என கூறப்பட்டுள்ளது.

FAKE ALERT: No, Kejriwal did not attack Shiv Sena for allying with Congress

இந்த செய்தியானது வாட்ஸ் அப், ஃபேஸ்புக் உள்ளிட்ட சமூக வலைதளங்களில் வைரலாக பரப்பப்பட்டு வரும் நிலையில், அதன் உண்மைத்தன்மை குறித்து டைம்ஸ் ஆஃப் இந்தியாவின் உண்மை கண்டறியும் குழு ஆய்வு மேற்கொண்டது.

அதில், அரவிந்த் கெஜ்ரிவாலின் அதிகாரப்பூர்வ ட்விட்டர் பக்கத்தில் பதிவிடப்பட்டதாக உலா வரும் புகைப்படம் போலி என தெரியவந்துள்ளது. ஏராளமான எழுத்து பிழைகளுடன் சமூக வலைதளங்களில் வைரலாகும் அந்த புகைப்படத்தில் பிப்ரவரி 11ஆம் தேதி மாலை 4.27 மணி என்று உள்ளது.


ஆனால், கெஜ்ரிவால் தனது அதிகாரப்பூர்வ ட்விட்டர் பக்கத்தில் இருந்து பிப்ரவரி 11ஆம் தேதி மாலை 6.03 மணிக்கு தனக்கு வாழ்த்து தெரிவித்த உத்தவ் தாக்கரேவுக்கு நன்றி தெரிவித்து பதில் ட்வீட் செய்துள்ளார். ஆனால், சிவசேனா கட்சியையோ, உத்தவ் தாக்கரேவையோ அரவிந்த் கெஜ்ரிவால் சாடவில்லை.


எனவே, அரவிந்த் கெஜ்ரிவால் தனது அதிகாரப்பூர்வ ட்விட்டர் பக்கத்தில் பதிவிட்டதாக வைரலாகும் புகைப்படம் போலியானது முற்றிலும் தவறானது.