FACT CHECK: தப்பு தப்பா வைரலாகும் வீடியோ; பிரான்ஸ் முஸ்லிம் பெண்ணிற்கு நேர்ந்த கொடூரம்?

பிரான்ஸ் போலீஸ்காரர் ஒருவர் இளம்பெண்ணை மிகவும் மோசமாக தாக்குகிறார். இவர் ஒரு முஸ்லிம் பெண். அவரது முகத்தை மூடியிருந்த ஆடையை விலக்கி மிகவும் கடுமையாக நடந்து கொள்கிறார். Motivational Muslims என்ற பேஸ்புக் பக்கத்தில் இந்த விளக்கத்துடன் ஒரு வீடியோ பதிவிடப்பட்டுள்ளது. இதையடுத்து பிரான்ஸ் அரசைக் கண்டித்து முஸ்லிம்கள் பலரும் விமர்சனங்களை முன்வைத்து வருகின்றனர். ஏற்கனவே பிரான்ஸில் அடுத்தடுத்து வன்முறை சம்பவங்கள் அரங்கேறி வரும் சூழலில், இந்த வீடியோ மற்றொரு சர்ச்சைக்கு வித்திட்டுள்ளது.

உண்மை என்ன?

இந்த வீடியோவில் பதிவான சம்பவங்கள் கனடாவில் நிகழ்ந்துள்ளன. கடந்த டிசம்பர் 2017ல் மேற்கு கனடாவின் அல்பெர்டா நகரில் கல்கேரியில் தலியா காஃபி என்ற கருப்பின பெண்ணை போலீசார் கைது செய்தனர். அந்த வீடியோ தான் இது.

சரிபார்த்தல்

கூகுள் க்ரோமின் inVID எக்ஸ்டன்ஷனைப் பயன்படுத்தி, மேற்கூறிய வீடியோவை கீ-பிரேம்களாக பிரித்தோம். பின்னர் ரிவர்ஸ் இமேஜ் முறையில் கூகுளில் தேடினோம். இதே வீடியோவுடன் கூடிய ஏராளமான பதிவுகள் கிடைத்தன. அதில் ஒன்று, ”கருப்பின பெண்ணை மிகவும் மோசமாக நடத்தும் காவலர்கள்” என்ற பெயரில் பதிவு ஒன்று இருந்தது. அது அக்டோபர் 29, 2020ஆம் தேதியில் பதிவிடப்பட்டது. அதில் கனடாவில் 2017ஆம் ஆண்டு நடந்த சம்பவம் என்று தெளிவாக குறிப்பிடப்பட்டுள்ளது.

அதாவது, இரவு 10 மணிக்கு மேல் ஊரடங்கு உத்தரவு அமலில் இருந்த நிலையில், அதை மீறி செயல்பட்ட கருப்பின பெண் தலியா காஃபியை போலீசார் கைது செய்துள்ளனர். பின்னர் அலெக்ஸ் டன் என்ற காவலரால் இழுத்து கீழே தள்ளப்பட்டுள்ளார். இந்த ஒட்டுமொத்த சம்பவம் குறித்தும் Global News செய்தி தளத்தில் அக்டோபர் 27, 2020 அன்றைய தேதியில் பதிவிடப்பட்டுள்ளது.

FACT CHECK: அர்னாப் கோஸ்வாமிக்கு சிறையில் முதலிரவா?

முடிவு

டைம்ஸ் பேக்ட் செக் மூலம் ஆராய்ந்ததில் கனடாவில் நிகழ்ந்த பழைய வீடியோவை எடுத்து பிரான்ஸில் முஸ்லிம் பெண் மீதான தாக்குதல் என்று தவறாக குறிப்பிட்டுள்ளது தெரியவந்துள்ளது.