பசுக்கள் அமைச்சகத்தைத் தொடர்ந்து ’பசு எக்ஸ்பிரஸ்’ - பசுவிற்கு வாரி வழங்கும் மாநில அரசு!

மத்தியப் பிரதேசத்தில் சிவராஜ் சிங் சவுகான் தலைமையிலான பாஜக ஆட்சி நடைபெற்று வருகிறது. இங்கு விரைவில் சட்டசபை தேர்தல் நடைபெறவுள்ளது. இதையொட்டி பாஜக, காங்கிரஸ் உள்ளிட்ட கட்சியினர் தீவிர நடவடிக்கைகளில் ஈடுபட்டுள்ளனர்.

ஆளும் பாஜகவின் இந்துத்துவா கொள்கையை, இம்முறை காங்கிரஸும் கையில் எடுத்துள்ளது. அதாவது கோவில்களுக்கு செல்வது, பசுக்களை கௌரவிப்பது போன்ற செயல்பாடுகள் மேற்கொண்டு வருகின்றனர்.

அதிலும் பசுக்களுக்கு தனியாக அமைச்சகம் அமைக்கப்படும் என்று முதலமைச்சர் சிவராஜ் சிங் சவுகான் தேர்தல் பிரச்சார அறிவிப்பாக ஒன்றை சமீபத்தில் வெளியிட்டிருந்தார். இந்நிலையில் காயமடையும் கால்நடைகளுக்கு சிகிச்சையளிக்க பசு எக்ஸ்பிரஸ் சேவையை மாநில அரசு தொடங்கும் என்று கூறப்பட்டுள்ளது.

இதன்மூலம் பாதிக்கப்படும் கால்நடைகளுக்கு உரிய சிகிச்சை அளிக்க வாகனச் சேவை அறிமுகம் செய்யப்படும். அதில் கால்நடை மருத்துவர் மற்றும் உதவியாளர்கள் இருப்பர்.

இந்தச் சேவையைப் பசு உரிமையாளர்கள் பெறும் வகையில் உதவி எண்ணும் அறிவிக்கப்பட்டுள்ளது. அது 1962 என்ற எண் ஆகும். இதன்மூலம் பசுக்களுக்கு புதுப்புது சலுகைகள் வாரி வழங்கப்படுவது தெளிவாகத் தெரிகிறது.

After cow ministry, Shivraj Singh Chouhan Govt to launch 'Cow Express'.