தகவல் திருட்டு எதிரொலி: எஸ்கேப் ஆகும் காங்கிரஸ்

காங்கிரஸ் கட்சியின் அதிகாரப்பூர்வ மொபைல் மூலமாக அதன் பயனாளர்களின் தகவல்கள் விற்கப்படுவதாக எழுந்த புகாரைத் தொடர்ந்து அந்த அப்ளிகேஷனை அக்கட்சி நீக்கியுள்ளது.

பிரதமர் நரேந்திர மோடி பற்றிய அனைத்து தகவல்களையும் அளிக்கும் அவரது அதிகாரப்பூர்வ மொபைல் அப்ளிகேஷன் நமோ (NaMo) என்ற பெயரில் பயன்பாட்டில் உள்ளது.

இந்த அப்ளிகேஷன் பயன்படுத்துபவர்களின் பெயர், ஈமெயில் முகவரி, போட்டோ, மொபைல் எண் போன்ற தகவல்கள் அனைத்தும் அமெரிக்காவில் உள்ள கிளவர் டாப் (Claver Tap) என்ற நிறுவனத்துடன் பகிரப்படுகிறது என்பதை பிரான்ஸ் நாட்டைச் சோ்ந்த எலியட் ஆண்டர்சன் என்பவர் அம்பலப்படுத்தினார்.
இதனையடுத்து காங்கிரஸ் கட்சியின் அதிகாரப்பூர்வ அப்ளிகேஷன் மூலமாகவும் அதை பயன்படுத்துவோர் பற்றிய விவரங்கள் ரகசியமாக சிங்கப்பூருக்கு அனுப்பப்படுகிறது என்று குற்றச்சாட்டு முன்வைக்கப்பட்டது. இதன் எதிரொலியாக அக்கட்சி தனது அதிகாரப்பூர்வ மொபைல் அப்ளிகேஷனை கூகுள் ப்ளே ஸ்டோரிலிருந்து நீக்கவிட்டது.
இதுகுறித்து ட்விட்டரில் பதிவிட்டுள்ள அக்கட்சியின் சமூக வலைத்தளப் பிரிவின் தலைவரும் நடிகையுமான திவ்யா ஸ்பந்தனா, “உங்களைப் பற்றிய விவரங்கள் பகிரப்படுகிறது என்று கவலைப்படுவதை மறந்துவிடுங்கள். நாங்கள் உங்களைப் பற்றிய தகவல்களை மொபைல் அப்ளிகேஷன் மூலம் பெறவில்லை.” என்று கூறியுள்ளார். மேலும், இந்தக் குற்றச்சாட்டை முட்டாள்தனமானது என்றும் விமர்சித்துள்ளார்.