நீதிபதிகளைத் தொடர்ந்து தேர்தல் ஆணையாளர்களுக்கும் இருமடங்கு சம்பள உயர்வு!

புத்தாண்டு முதல் உச்ச, உயர்நீதிமன்ற நீதிபதிகளுக்கு 1.5 லட்சம் ரூபாய் வரையில் சம்பள உயர்வு வழங்கப்பட்டுள்ள நிலையில், தற்போது தேர்தல் ஆணையாளர்களுக்கும் சம்பளம் இரு மடங்காக உயர்த்தப்படுகிறது.

கடந்த டிசம்பர் மாதம் இறுதியில் நடந்த நாடாளுமன்ற கூட்டத்தில், நீதிபதிகளின் சம்பளத்தை உயர்த்தி, சட்ட அமைச்சர் ரவிசங்கர் மசோதா ஒன்றை தாக்கல் செய்தார். அதன்படி, வரும் புத்தாண்டு முதல் உச்சநீதிமன்ற நீதிபதிகளுக்கும், உயர்நீதிமன்ற நீதிபதிகளுக்கும் சம்பள உயர்வு அளிக்கப்பட்டது. இது வருகிற பட்ஜட் தொடரில் நிறைவேற்றப்படும்.

அதன்படி, உச்சநீதிமன்றத்தின் தலைமை நீதிபதிகளுக்கு ஒரு லட்சம் ரூபாயிலிருந்து, புத்தாண்டு முதல் 2.80 லட்சம் ரூபாயாக உயர்த்தப்பட்டது.

இதே போல், உச்சநீதிமன்ற நீதிபதிகள் மற்றும் உயர்நீதிமன்ற தலைமை நீதிபதிகளின் மாதச் சம்பளம் 90 ஆயிரம் ரூபாயிலிருந்து, 2.50 லட்சம் ரூபாய் உயர்த்தப்பட்டது.

இந்நிலையில், தேர்தல் கமிஷன் சட்டம் 1991 -ன் அடிப்படையில் நீதிபதிகளின் சம்பளத்துக்கு இணையாக , 3 தேர்தல் ஆணையாளர்களின் சம்பளமும் 2.50 லட்சம் ரூபாய் வரையில் அதிகரிக்கப்படும் என்று எதிர்பார்க்கப்படுகிறது.