உங்க தேர்தல்ல ஏன்யா எங்கள இழுக்குறீங்க! மோடிக்கு பாகிஸ்தான் எச்சரிக்கை

குஜராத் சட்டமன்ற தேர்தலில், பாகிஸ்தானை வம்புக்கு இழுக்க வேண்டாம் அந்நாட்டு வெளியுறவுத்துறை பிரதமர் மோடிக்கு பதிலடி கொடுத்துள்ளது


குஜராத்தில் இரண்டாம் கட்ட தேர்தல் வரும் 14ம் தேதி நடைபெற உள்ளது. இந்நிலையில், நேற்று அங்குள்ள பலன்பூரில் பிரதமர் மோடி தேர்தல் பிரச்சாரம் மேற்கொண்டார்.

அப்போது பேசிய அவர், காங்கிரஸ் மூத்த தலைவர் மணிசங்கர் வீட்டில் கடந்த சில நாட்களுக்கு முன்பு ஒரு கூட்டம் நடந்ததாகவும், அந்த கூட்டத்தில், பாகிஸ்தான் தூதர், பாகிஸ்தான் முன்னாள் வெளியுறவு அமைச்சர், இந்தியாவின் முன்னாள் துணை ஜனாதிபதி, முன்னாள் பிரதமர் மன்மோகன் சிங் ஆகியோர் கலந்து கொண்டதாகவும் பத்திரிகையில் செய்திகள் வெளியானதாக குறிப்பிட்டார்.

மேலும், அந்த கூட்டத்திற்கு மறுநாள் தான், மணிசங்கர் தன்னை இழிவானவர் என்று விமர்சித்ததாகவும், குஜராத் முதல்வராக காங்கிரசை சேர்ந்த அகமது படேல் போட்டியிடுவதற்கு பாகிஸ்தான் ஆதரவு தெரிவிப்பதாகவும் குற்றம் சாட்டினார்.

தொடர்ந்து பேசிய மோடி, குஜராத் தேர்தலில் காங்கிரசும் பாகிஸ்தானும் சேர்ந்து பாஜகவை வீழ்த்த நினைப்பதாகவும், அது ஒரு போதும் நடக்காது என்றும் தெரிவித்தார்.
India should stop dragging Pakistan into its electoral debate and win victories on own strength rather than fabricated conspiracies, which are utterly baseless and irresponsible. — Dr Mohammad Faisal (@ForeignOfficePk) December 11, 2017 இந்நிலையில், பாகிஸ்தானின் வெளியுறவு அமைச்சகத்தின் செய்தி தொடர்பாளர் தனது டுவிட்டர் பக்கத்தில் மோடிக்கு பதிலடி கொடுத்துள்ளார்.

அதில், குஜராத் தேர்தலில் மோடி, ஆதாரமற்ற செய்திகளை பேசியதாகவும் தெரிவித்துள்ளார். மேலும், அரசியல் கட்சிகள் தங்கள் சொந்த பலத்தில் தேர்தலில் வெற்றி பெற்று காட்டட்டும், அதற்கு பதிலாக, பாகிஸ்தானை தேவையில்லாமல் சீண்ட வேண்டாம் என்றும் சாடினார்.