மகளிர் தின சிறப்பு: ’ஷீ ஷாப் ’ திட்டம் அறிமுகம்

கொச்சி: கேரள மாநிலம் கொச்சியில் பெண்கள் தினத்தை முன்னிட்டு பெண்களுக்கென சிறப்பு நடமாடும் உணவகம் துவங்க கொச்சி மாநகராட்சி திட்டமிட்டுள்ளது.

கேரள மாநிலம் கொச்சியில் பெண்களுக்கென பிரத்யேகமாக 'ஷீ ஆட்டோ ' எனும் ஆட்டோ சேவை சமீபத்தில் தொடங்கப்பட்டது. இத்திட்டம் பொது மக்களிடையே மிகுந்த வரவேற்பை பெற்றது.

இந்நிலையில் கொச்சி மாநகராட்சி தனது அடுத்த திட்டமாக நடமாடும் உணவகத்தை தொடங்க உள்ளது . பொதுவான ஒரு இடத்தில் உணவு தயார் செய்யப்பட்டு, பின்னர் ஆட்டோ ரிக்‌ஷாக்களின் மூலம் வாடிக்கையாளர்கள் வீட்டிற்கே கொண்டு சென்று விநியோகிக்கப்படும். இத்திட்டத்திற்கு 'ஷீ ஷாப்' என பெயரிடப்பட்டுள்ளது. இத்திட்டம், வருகிற 8 ஆம் தேதி , உலக மகளிர் தினத்தன்று அறிமுகமாக இருக்கிறது.

கேரள அரசின் மகளிர் மேம்பாட்டு கழகத்தின் கீழ் இத்திட்டம் செயல்படுத்தப்படுகிறது. ராகி, வாழைப்பழம், அவல் , மீல்ஸ், மினி மீல்ஸ் உள்ளிட்ட பல்வேறு வகையான உணவு வகைகள் ஷீ ஷாப் உணவகத்தில் கிடைக்கும் என தெரிவிக்கப்பட்டுள்ளது.

இது குறித்து கொச்சி மேயர் சவ்மினி ஜெயின் கூறுகையில், ஷி ஷாப் நடமாடும் உணவகத்தில் ஆரோக்கியமான உணவு வகைகள் தயார் செய்யப்பட்டு, முதற்கட்டமாக சுமார் 150 ஆட்டோ ரிக்‌ஷாக்களில் விநியோகிக்கப்படும் என தெரிவித்தார்.