ராமர் கோயில் அடிக்கல் நாட்டு விழா இந்த தேதியில் நடக்கும்!

அயோத்தியில் ராமர் கோயில் கட்டுவதற்கான அடிக்கல் நாட்டு விழா ஆகஸ்ட் மாதத்தின் முதல் வாரம் நடைபெறும் என எதிர்பார்க்கப்படுகிறது. இந்நிகழ்ச்சிக்காக பிரதமர் நரேந்திர மோடியிடம் ஜூலை 29, ஆகஸ்ட் 5 ஆகிய இரண்டு தேதிகள் பரிந்துரைக்கப்பட்டுள்ளதாக ஸ்ரீ ராம ஜன்மபூமி தீர்த்தா சேத்திர அறக்கட்டளை தெரிவித்துள்ளது.

இதுகுறித்து அறக்கட்டளை உறுப்பினர் கோவிந்த் கிரி மகாராஜ் பேசியபோது, “அடிக்கல் நாட்டு விழா நடத்துவதே எங்களது முதல் குறிக்கோள். இதற்கு பிரதமர் நரேந்திர மோடிக்கு அழைப்பு விடுத்திருக்கிறோம். ஜூலை 29, ஆகஸ்ட் 5 ஆகிய தேதிகளை நல்ல நாட்களாக குறித்து பிரதமருக்கு பரிந்துரைத்திருக்கிறோம்.

பிரதமர் நரேந்திர மோடியின் முன்னிலையில் அடிக்கல் நாட்டு விழா நடைபெறும். ஆகஸ்ட் மாதத்தின் முதல் வாரத்திற்குள் அடிக்கல் நாட்டு விழா முடிவடைந்திருக்கும்” என்று தெரிவித்துள்ளார்.

அறக்கட்டளையின் பொதுச் செயலாளர் சம்பத் ராய் பேசியபோது, “அயோத்தியில் பிரம்மாண்டமான ராமர் கோயில் கட்டுமானப் பணி தொடங்கி 3 முதல் 3.5 ஆண்டுகளுக்குள் கட்டி முடிக்கப்படும்” என்று தெரிவித்துள்ளார்.

உச்ச நீதிமன்ற உத்தரவின்படி ராமர் கோயில் கட்டுமானப் பணியை கவனிப்பது, கண்காணிப்பதற்கான உரிமை ஸ்ரீ ராம ஜன்மபூமி தீர்த்த சேத்திர அறக்கட்டளைக்கு வழங்கப்பட்டுள்ளது. இந்த அறக்கட்டளையின் இரண்டாவது கூட்டம் நேற்று நடைபெற்றது. இக்கூட்டத்தில் அடிக்கல் நாட்டு விழா குறித்து ஆலோசிக்கப்பட்டுள்ளது.